පෑලියගොඩ පොලිසියේ නිලධාරීන් තම සහෝදරයාට තුවාල සිදුවන අයුරින් පහර දුන්නේ තමා යයි වැරදීමෙන් බව හිටපු ආණ්ඩුකාර මෛත්රි ගුණරත්නගේ වැඩිමහල් පුත් නීතීඥ චරිත මෛත්රී ගුණරත්න පවසයි.
ඔහු පවසන්නේ පසුගිය 23 වැනිදා මුදල් වංචා චෝදනාවක් මත අත්අඩංගුවට ගත් පුද්ගලයන් පිරිසක් වෙනුවෙන් නෛතික කටයුතු කරන තම ජ්යෙෂ්ඨ නීතීඥවරයාගේ උපදෙස් මත පෑලියගොඩ පොලිසියට ගිය තමන්ට මෙම අත්අඩංගුවේ සිටින පුද්ගලයන්ට දැඩි සේ පහර දී ඇති බවත් එහිදී තමන් සමඟ ද මෙම පොලිස් නිලධාරීන් වාදයක පැටළුණු බවත්ය.
මෙහිදී තවදුරටත් එම සිදුවීම ඔහු විස්තර කරන්නේ මෙසේය.
“මම එදින ගියේ විශේෂ අපරාධ විමර්ශන ඒකකයට. එහිදී මට දැන ගන්නට ලැබුණා අපේ සේවාදායකයන්ට දැඩි ලෙස පොලිසියේදී හිරිහැර කර ඇති බව. ඔවුන් මත්ද්රව්ය චෝදනාවලට පටළවන බවට පොලිසිය තර්ජනය කර තිබුණා. පොලිසිය කියන ආකාරයට අනුව අවනත නොවුණහොත් මේ මත්ද්රව්ය චෝදනා මත දීර්ඝ කාලයක් හිරේ ඉන්න බවට බිය ගන්නා තිබුණා. “
“ ඊට ටික වෙලාවකින් මම දුරකථන ඇමතුමක් ගන්න එහාට ගියා. එනවිට මට ඇහුණා සිවිල් ඇඳුමින් සැරසුණු පොලිසියේ නිලධාරියෙක් මගේ සේවා දායකයාට ඇවිත් තර්ජනය කරනවා. ඔහු වටා ඉන්නේ ඔක්කොම මත්ද්රව්ය චෝදනාවලට අත්අඩංගුවට ගත් පුද්ගලයන්. ඔබත් පහසුවෙන් මේ චෝදනාවට හසු කරන්න පුළුවන් කියලා.“
“ මේ පොලිස් නිලධාරියා කවර නිලයක කෙනකුදැයි මට හරියටම අවබෝධ කර ගන්න බැරිවුණේ ඔහු සිවිල් ඇඳුමින් සිටිය නිසා. මම ඔහුට සාජන් මහත්තයා කියල කතා කළේ මට ඉතා පරුෂ වචන වලින් බැනගෙන ඉදිරියට ආව නිසයි. බැලුවාම ඔහු ප්රධාන පොලිස් පරීක්ෂක ලින්ටන් සිල්වා. ඔහු මාවද බියගන්වන සුළු ආකාරයට මා ඉදිරියට ඇවිත් මගේ අනන්යතාව විමසුවා. මා එවර ඔහුට මගේ නීතීඥ සංගමයෙන් ලබා දෙන නිල හැඳුනුම්පත පෙන්නුවා. ඔහු එහි විස්තර සටහන් පොතක ලියා ගත්තා.“
“මම ඔහුට කීවා මම සාජන් මහත්තයා කීවේ සිවිල් ඇඳුමින් සිටියදී තනතුරක් අඳුර ගන්න අපහසු නිසා කියල. ඔහු මට චෝදනා කළා බීමත්ව සිටිනවා කියල. මම කීවා එසේ නම් ඒ බව තහවුරු කර ගන්න මාව පරීක්ෂණයට ලක් කරන්න කියල. මගේ වෘත්තීයභාවය පිළිබඳවත් කිසිදු තැකීමක් නැතිව ක්රියා කළ මේ නිලධාරීන් මට ඉවත් වන ලෙසට තර්ජනය කළා.“
“ඊට පසුව මම ඔවුන්ගේ වෘත්තියභාවයක් නොමැති හැසිරීම් පිළිබඳව ශ්රි ලංකා නීතීඥ සංගමයට පැමිණිලි කළා. ඒ වගේම අදාළ පොලිස් අංශත් දැනුවත් කළා. අපේ සේවා දායකයා සිටි තත්ත්වය අනුව ඔහුගේ ආරක්ෂාව සහ සෞඛ්ය සම්බන්ධයෙන් අපගේ මැදිහත් වීම අත්යවශ්ය දෙයක් බව ඔවුන් විශ්වාස කළා. මේ නිසා තමයි මම පසුගිය 25 වනිදා නීතී විද්යාලයයේ තුන්වැනි වසරේ ශිෂ්යයක් වන මගේ මල්ලී , මිගාර මෙම සැකකරුවාට රාත්රි ආහාරද සමඟ එතැනට යැව්වේ.“
“ ඔහුට ඒ වෙලාවේ පොලිස් නිලධාරීන් දස දෙනකු විතර දැඩි සේ පහර දී තිබෙනවා. ඔවුන් අහල තියෙනවා තමුසේ එදාත් දැම්මනේ සද්දේ දැන් කෝ සද්ද කියල. මීට කලින් මගේ මල්ලී එතනට ගිහින් නෑ. එයින් තේරෙන්නේ ඔහු මා කියා වැරදීමකින් තමයි මල්ලිට මේ විදිහට අමානුෂිකව පහර දී තිබෙන්නේ. ඒ වෙලාවේ මල්ලි කියල තියනවා එයා හිටපු ආණ්ඩුකාර මෛත්රි ගුණරත්නගේ පුතා කියල. ඒ වෙලාවේ එතන සිටි එස්.අයි මහත්මයෙක් මේ පහර දීම නවත්වන්න කියල කියල තිබෙනවා.“ යයි නීතීඥ චරිත ගුණරත්න පවසයි.
මේ වනවිට මෙම පහර දීම සම්බන්ධයෙන් ප්රධාන පොලිස් පරීක්ෂක ලින්ටන් සිල්වා ඇතුළු පොලිස් නිලධාරීන් ගේ වැඩ තහනම් කොට ඇති අතර ශ්රී ලංකා නීතීඥ සංගමය පොලිස්පතිවරයාගෙන් සහ නීතිපතිවරයාගෙන් ඉල්ලා ඇත්තේ සෙමම පහර දීම සම්බන්ධයෙන් අවශ්ය දැඩි පියවර ගන්නා ලෙසය.
