“මේ අවස්ථාවේ රට භාර ගත්තේ නැතිනම් රටක් ඉතිරි වෙන්නේ නෑ. “ මල්වතු පාර්ශවයේ මහා නායක අති පූජ්ය තිබ්බටුවාවේ ශ්රී සුමංගල නා හිමිපාණන් ජාතික ජන බලවේගයේ නායක අනුර කුමාර දිසානායකට අද (19) කීහ.
උන්වහන්සේ මේ බව ප්රකාශ කරනු ලැබුවේ ජාතික ජන බලවේගයේ නායක අනුර කුමාර දිසානායක සහ ජාතික ජන බලවේගයේ ජාතික විධායක සභික ලාල් කාන්ත මල්වතු මහා නායක හිමියන් බැහැදැක රටේ පවතින වත්මන් තත්ත්වය පිළිබඳ සාකච්ඡා කළ අවස්ථාවේ දී ය.
රටේ පවතින වත්මන් තත්ත්වය සම්බන්ධව මල්වතු මහා නායක හිමිපාණන් මෙන්ම අස්ගිරි පාර්ශවයේ මහා නායක වරකාගොඩ ඤානරතන හිමිපාණන් සමග සාකච්ඡා කළ ජාතික ජන බලවේගයේ නායකයන් උන්වහන්සේලා වෙත රට පිළිබඳ ජාතික ජන බලවේගයේ ස්ථාවරය පැහැදිලි කර තිබිණි.
මහා නායක හිමිවරුන්ගේ හමුව පිළිබඳ කළ විමසීමක දී ජාතික ජන බලවේගයේ නායක අනුර කුමාර දිසානයක පැවසුවේ රට තුළ ඇති වී තිබෙන තත්ත්වයත් එය වෙනස් කිරීම සඳහා වූ වැඩපිළිවෙළත් පිළිබඳව සාකච්ඡාවක මහා නායක හිමිපාණන් වහන්සේලා සමග නිරත වූ බවය.
රට සෑම අංශයකින්ම ගිලා බැස ඇති අවස්ථාවක රට ගොඩනැගීම සඳහා ජාතික පුනරුද වැඩසටහනක් අවශ්ය බව කී අනුර කුමාර දිසානායක ඒ වෙනුවෙන් හාමුදුරුවන් වහන්සේලාත්, සෑම ආගමකම පූජක තුමන්ලාත්, මේ රටේ වෘත්තීයවේදීන්, කර්මාන්තකරුවන්, ව්යාපාරික ප්රජාව සමග පුළුල් සංවාදයක් ගොඩනගා ඇති බව කීවේය. මෙය හුදු දේශපාලන පක්ෂයක වැඩක් නොව, ජාතික ව්යායාමයක් බවත් එවැනි ව්යායමකින් තොරව ගිලුණු රට ගොඩගත නොහැකි බවත් උන් වහන්සේලා සමග කළ සංවාදයේ දී සඳහන් වූ බව ද ජාතික ජන බලවේගයේ නායක අනුර කුමාර දිසානායක පැවසුවේය.
