මනම්පිටිය නිමල් ජයරත්න –
මියගොස් නරක් වී තිබෙන වන අලියෙකුගේ සිරුරක් දින ගණනාවක් සිට වැලිකන්ද සිංහපුර කොට්ඨාසයේ දිඹුලාන 09 ඇලේ වෙල්යායේ වැටී ඇති බව ප්රදේශවාසීන් සහ ගොවිජනතාව සඳහන් කරති.
එම නරක් වූ අලියාගේ සිරුරින් දුගඳ හමන නිසා කුඹුරු වගා කරගැනීමට පවා අපහසු වී ඇති බව ගොවීන් කියති.
කාලයක් තිස්සේ මෙම වන අලියා රෝගාතුරව වෙල්යායේ සැරිසරූ බවත්, අනතුරුව කුඹුරු යායේම එම අලියා මියගොස් වැටී ඇති බවද ගොවීන් කියති.
මේ බව වැලිකන්ද වනජීවී නිලධාරීන් දැනුවත් කිරීමෙන් පසු එක් අවස්ථාවක් පැමිණ ගිය බවත්, වන අලියා කුමන හේතුවකින් මියයන්නට ඇද්ද යන්න පරීක්ෂා කිරීමට වනජීවී දෙපාර්තමේන්තුවේ පශු වෛද්යවරයෙකු පැමිණෙනු ඇති බවට වනජීවින් නිලධාරීන් ප්රකාශ කර ද 07 වෙනිදාට දින අටක් පමණ කාලයක් ගත වුවද තවමත් වන අලියාගේ සිරුර වෙල්යායේ නරක් වෙමින් පවතින බවද ගොවීන් පෙන්වා දෙති.
අප මේ පිළිබඳ වැලිකන්ද වනජීවී කාර්යාලයෙන් දුරකථනයෙන් කළ විමසීමකදී එහි නිලධාරියකු සඳහන් කළේ වනජීවී දෙපාර්තමේන්තුව පශු වෛද්යවරයෙකු පැමිණ පශ්චාත් මරණ පරීක්ෂණ කටයුතු කිරීමෙන් අනතුරුව අවසන් කටයුතු කිරීමට කඩිනමින් ක්රියා කරන බවයි.
