සිය මාස පහ හමාරක් වයස කිරි කැටි ළදරුවා කුලියට ගත් ලයින් කාමරය තනි කර දමා විදෙස්ගත වු බව කියන 21 හැවිරිදි යුවලක් පිළිබඳව පොලිසිය පරීක්ෂණ පවත්වයි.
ගලහ ලූල් කඳුර වත්තේ ලයින් කාමරයක් තුළ මෙම දරුවා තනි කර දමා ගිය යුවල සති දෙකකට පමණ පෙර මඩකලපුව වාකරේ සිට තාවකාලික පදිංචියට එම ස්ථානයට පැමිණ ඇති බවත්, ඔවුන් පැමිනෙද්දීත් එම ලයින් කාමරයේ පදිංචිව සිටි කාන්තාව මානසික රෝගයකින් පෙළෙන තැනැත්තියයක් බවත් පොලිසියපවසයි.
මොවුන් පෙරේදා (22) වතු නිවාස පේලියේ පදිංචි පුද්ගලයෙකු අමතා දුරකථනය ඇමතුමක් දී පවසා ඇත්තේ තමන් විදේශ ගතවන බැවින් කාමරයේ සිටින දරුවා කාට හෝ දී රැක බලා ගැනීමට කටයුතු කරන ලෙසය.
මේ සම්බන්ධව වතු පාලන අධිකාරිය දැනුම්වත් කර වත්තේ පවුල් සෞඛ්ය සේවිකාව සමග ගොස් බලද්දී ළදරුවා කාමරයේ හඬමින් සිටිය දී හමු වී ඇත. අනතුරුව පවුල් සෞඛ්ය සේවිකාව මගින් දරුවා දෙල්තොට රෝහලට ඇතුළත් කර තිබිණි.
මව්කිරි ලබාදීමේ පහසුකම් දෙල්තොට රෝහල සතුව නොමැති බැවින් දරුවා පේරාදෙණිය රෝහලට යොමු කළ බවත් සිද්ධිය සම්බන්දව මධ්යම පළාත් සෞඛ්ය අධ්යක්ෂවරයා සහ මහනුවර දිස්ත්රික් ප්රාදේශීය සෞඛ්ය අධ්යක්ෂවරයා ද දැනුම්වත් කළබවත් ගලහ දෙල්තොට රෝහලේ සෞඛ්ය වෛද්ය නිලධාරි කපිල අතපත්තු පැවසුවේය.
සිද්ධිය සම්බන්ධව විමර්ශන ආරම්භ කර ඇති ගහල පොලිසිය පවසන්නේ සැබෑ ලෙසම මෙම යුවල විදේශගත වූවා ද විදේශගතවූ මුවාවෙන් රට තුළම සිටිනවා ද යන්න පිළිබඳ සැකයක් ඇති වී තිබෙන බවය.
