මනම්පිටිය නිමල් ජයරත්න –
පොළොන්නරුව කරපොල ශිව දේවාලය පවත්වාගෙන යෑමේදී වනජීවී නිලධාරීන්ගෙන් තමන්ට දැඩි බලපෑම් එල්ල වී ඇති බැවින්,ඒ සඳහා කඩිනම් විසඳුම් ලබාදෙන ලෙසට බල කරමින් කරපොළ මුතුගල මදුරංගල ප්රදේශවල හින්දු, බෞද්ධ,ගම්වාසීන් පිරිසක්, අද (15)ට යෙදී තිබූ මහා ශිව රාත්රී දිනයේ දේවාලය ඉදිරිපිට විරෝධතාවයක නිරත වූහ.
කරපොළ ශිව දේවාලයේ ප්රධානය පූජාව පැවැත්වීමෙන් අනතුරුව, උතුරු මැද පළාතේ හින්දු පූජකවරුන්ගේ සංගමයේ ලේකම්,කේ. දයානන්දන්, එම සංගමයේ සභාපති,එස්.තේවරාසා, එම කමිටුවේ ලේකම් රජනි කාන්දන්, මෙම කමිටුවේ එස්, ලක්ෂ්මන් ඇතුළු හින්දු පූජකවරුන් මෙන්ම ප්රදේශවාසීන් විශාල පිරිසක් එක්ව සිටියහ.
මෙම හින්දු දේවාලය සිදුකරගෙන යෑමේදී ඉකුත් පෙබරවාරි 11 වෙනිදා සිට වැලිකන්ද වනජීවී නිලධාරීන්ගෙන් දේවාලය ඉවත් කරගන්නා ලෙසට බල කරමින් විවිධ අවස්ථාවලදී බාධා එල්ල කරන බවත්, මෙම තත්ත්වයන් මත කරපොළ, මුතුගල, ඇතුළු ප්රදේශයේ ගම්මාන අටක පමණ හින්දු ආගමිකයන්ගේ ආගමික කටයුතු සිදු කරගෙන යාමේදී දැඩි බාධා එල්ල වී ඇති බවත් උතුරු මැද පළාත් හින්දු පූජක සංගමයේ ලේකම් කේ. දයානන්දන් මෙම මාධ්ය සාකච්ඡාවේදී හෙළිදරව් කළේය.
මෙම විරෝධතාවයෙන් අනතුරුව හින්දු පූජකවරුන් මාධ්ය සාකච්ඡාවක් පවත්වමින් සඳහන් කළේ, වසර ගණනාවක් පැරැණි මෙම ශිව දේවාලයේ ආගමික කටයුතු වාර්ෂිකව සිදු කරගෙන ගියද එවකට පැවති කිසිදු රජයකින් බලපෑම් එල්ල නොවුන බවය.
මෙම දේවාලය පවත්වා ගෙන යෑමේදී, ශ්රී ලංකා මහවැලි අධිකාරිය මගින් වෙන්කර දුන් බලපත්රය පවා තිබියදී, වර්තමානයේ වනජීවී දෙපාර්තමේන්තුව හරහා එල්ල කරන මෙම බලපෑම් පිළිබඳව ජනාධිපතිවරයාගේත්, වනජීවී දෙපාර්තමේන්තුවේ උසස් නිලධාරීන්ගේ මෙන්ම මීට සම්බන්ධ සියලු බලධාරීන්ගේත් අවධානය යොමුකර ශිව දේවාලයේ ආගමික කටයුතු සිදු කිරීමට අවසර ලබාදෙන ලෙස ඔවුහු ඉල්ලා සිටිති.
