මනම්පිටිය නිමල් ජයරත්න –
අම්පාර රත්කිඳ විදුලි කුටියේ සිට උල්හිටිය රත්කිද මහවැලි සංචාරක බංගලාව දක්වා දිවෙන විදුලිවැට වෙනස් කර, ශ්රී ලංකා මහවැලි අධිකාරියට අයත් අක්කර සීයයක භූමි ප්රමාණයක්, කිසියම් පුද්ගලයෙකුට හෝ සමාගමකට බදු දීමට පසුගියදා අම්පාර දිස්ත්රික් සම්බන්ධීකරණ කමිටුවේ ගත් තීරණයට ප්රදේශයේ ගොවිජනතාවගේ, සහ ධීවරයින්ගේ මෙන්ම වනජීවී නිලධාරීන්ගේ විරෝධය පළ වී තිබේ.
දිගාමඩුල්ල දිස්ත්රික් පාර්ලිමේන්තු මන්ත්රී මුතු රත්වත්තේ සහ දිගාමඩුල්ල දිස්ත්රික් පාර්ලිමේන්තු මන්ත්රී, සමාජ හා ආරක්ෂක හා ප්රජා සවිබල ගැන්වීමේ හා අම්පාර දිස්ත්රික් සම්බන්ධීකරණ කමිටුවේ සම සභාපති වසන්ත පියතිස්සගේ ප්රධානත්වයෙන් පැවැති අම්පාර දිස්ත්රික් සම්බන්ධීකරණ කමිටු රැස්වීමේදි ගම්වාසින් එම අලි වැට වෙනස් කරන ලෙසට යෝජනාවක් ඉදිරිපත් කොට තිබේ.
මාදුරුඔය ජාතික වනෝද්යාන කාර්යාලයට සහ එම නිලධාරීන්ට දුරකථන පණිවිඩ ඔස්සේ මෙම සම්බන්ධීකරණ කමිටුවෙන් ගත් තීරණය දැනුම්දී ඇත. දිස්ත්රික් සම්බන්ධීකරණ කමිටුව ගත් එම තීරණයට අනුව ඉකුත්, 16 වෙනිදා හේනානිගල වනජීවි නිලධාරීන් පිරිසක් මෙම ප්රදේශය නිරීක්ෂණය කර තිබේ. ඔවුන් කියන්නේ ව විදුලි වැට වෙනස්කර ප්රදේශයේ අලි ඇතුන් වන සතුන් මෙන්ම මුවන්, ගෝනුන්, සැරිසරන රක්ෂිතය කිසියම් පිරිසක් විසින් වනසා ඇති බව ද වනජීවී නිලධාරිහු පවසති.
ඒ අනුව ශ්රී ලංකා මහවැලි අධිකාරිය සතු එම භූමියේ දැනට වන අලින්, මුවන්, උරග විශේෂයන් නේවාසිකව සිටින බැවින්, වනසත්ව හා වෘක්ෂලතා ආරක්ෂක ආඥා පනතේ 9 [ අ ] 01 වගන්තිය යටතේ එවැනි කටයුත්තක් සඳහා ඉඩම් බැහැර කිරීම, අධ්යක්ෂ ජෙනරාල්වරයාගේ අවසර මත සිදුකළ යුතු බවද දන්වා ඇත.
කෙසේ වෙතත් මේ වනවිට ,වන අලින්, මුවන්, ගෝනුන්, සැරිසරන එම භූමියේ ඉදිකර ඇති විදුලි වැට වෙනස් කර ඇති බව වනජීවී නිලධාරිහු සඳහන් කරති.
අක්කර සියයකට ආසන්න භූමි ප්රමාණයක් මේ යටතේ ඉවත් කිරීම සහ සංවර්ධන කටයුත්තකට බලාපොරොත්තුවෙන් බැහැර කරන්නේ නම් ඒ සඳහා විධිමත් පාරිසරික බලපෑම් තක්සේරුවක් ලබා ගැනීමෙන් පසු සිදුකළ යුතු බව හේනානිගල හා උල්හිටිය වනජීවි නිලධාරින් විසින්, නැගෙනහිර සහකාර වනජීවී අධ්යක්ෂවරයා වෙත යෝජනා කර යැවූ ලිපියක සඳහන්වේ.
