මල්වතුහිරිපිටිය ප්රදේශයේ නිවසක ඉතා සූක්ෂ්ම ලෙස ගබඩා කර තිබූ ඩීසල් ලීටර් 400ක ප්රමාණයක් සමග සැකකරුවෙක් අද (03) පොලිසිය විසින් අත් අඩංගුවට ගනු ලැබුවේය.
පිරවුම්හල්වලින් අවස්ථා කිහිපයකදී බැරල්වලට ඉන්ධන ලබාගෙන මෙලෙස රහසිගතව ගබඩා කර ඇති මෙම පුද්ගලයා අත් අඩංගුවට පත් වන්නේ රට තුළ ඇති වී තිබෙන අතාර්කික ඉන්ධන පෝලිම් සමග නීති විරෝධී ලෙස ඉන්ධන තොග එක් රැස් කරන්නන් සොයා සිදුකරන දීප ව්යාප්ත විශේෂ මෙහෙයුම් මාලාවක් අතර තුරය.
මල්වතුහිරිපිටිය පොලිස් වසමේ උතුරු අර මංගොඩ, බුත්පිටිය ප්රදේශයේ පදිංචි ව්යාපාරිකයෙකුවූ මෙම සැකකරු හෙට දිනයේදී අධිකරණයට ඉදිරිපත් කිරීමට නියමිතය.
ඉරානයට එල්ල වූ ප්රහාරත් සමඟ ලෝක වෙළඳපොළේ තෙල් මිල ඉහළ යා හැකි බවටත්, මෙරටට ඉන්ධන ගෙන්වීම සීමා විය හැකි බවටත් පවතින අනියත බිය හේතුවෙන් පසුගිය මාර්තු 01 වැනිදා සිටම විවිධ ප්රදේශවලින් මෙවැනි නීතිවිරෝධී රැස්කිරීම් වාර්තා වී ඇත.
ඉන්ධන පිරවුම්කරුවන් කියන්නේ එකම පුද්ගලයා ඉන්ධන පුරවාගෙන ගොස් ටැංකි හිස් කර දිනකට කීප වරක් නැවත නැවත පෝලිමට පැමිණ ඉන්ධන රැස් කරන බවය. ඇතැම් කාන්තාවන් පවා මේ ආකාරයේ ඉන්ධන රැස් කිරීම්වලට සම්බන්ධ වන බව ඔවුන්ගේ අත්දැකීමය.
මේ වනවිට බොහෝ නිවෙස්වල මේ ආකාරයේ අතිරේක ඉන්ධන රැස්කිරීම් පවතින බව පොලිසියට තොරතුරු ලැබෙමින් ඇති බව වාර්තා වේ.
ඊයේ (02) දින අනුරාධපුර සහ තඹුත්තේගම ප්රදේශවල සිදුකළ වැටලීම්වලදී පුද්ගලයින් තිදෙනෙකු අත්අඩංගුවට ගත් අතර, එහිදී පෙට්රල් සහ ඩීසල් ලීටර් 250කට අධික ප්රමාණයක් පොලිස් භාරයට ගැනුණි.
මාර්තු 01 වැනිදා මීගමුව ආශ්රිත ප්රදේශවල ධීවර කටයුතු සඳහා නිකුත් කරන ඉන්ධන අවභාවිත කරමින් ගබඩා කර තිබූ ස්ථාන දෙකක් වැටලීමට පොලිසිය සමත් විය.
මෙලෙස ඉන්ධන තොග රැස්කිරීමේ ප්රතිඵලයක් ලෙස පිරවුම්හල් අසල අනවශ්ය පෝලිම් නිර්මාණය වී ඇති අතර, එය රට තුළ සැබෑ ඉන්ධන හිඟයක් පවතින බවට වැරදි චිත්රයක් මවාපෑමට හේතු වී තිබේ.
මේ ආකාරයේ පෝලිම් ඇති වී තිබෙන්නේ ඛනිජ තෙල් නීතිගත සංස්ථාවේ සභාපතිවරයා, විදුලි බල සහ බලශක්ති ඇමතිවරයා පමණක් නොව රටේ ජනාධිපතිවරයා ද ඉන්ධන තොග ප්රමාණවත් පරිදි පවතින බැවින් අනවශ්ය ලෙස ඉන්ධන රැස් කිරීමෙන් වළකින ලෙස ජනතාවගෙන් ඉල්ලා සිටින පරිසරයක් තුළය. මේ වනවිට රටේ ඇති ඉන්ධන තොග ප්රමාණය සම්බන්ධව ජනාධිපතිවරයා අද පාර්ලිමේන්තුව අමතමින් දීර්ඝ පැහැදිලි කිරීමක් කරනු ලැබුවේය.
ආරක්ෂිත ක්රමවේදවලින් බැහැරව නිවාස හෝ වෙනත් ස්ථානවල මෙලෙස දැවෙන සුළු ද්රව්ය ගබඩා කිරීම දැඩි අනතුරක් මෙන්ම දඬුවම් ලැබිය හැකි වරදක් බව පොලිස් මූලස්ථානය පවසයි. බලපත්ර රහිතව මෙලෙස ඉන්ධන රැස් කරන්නන් හඳුනා ගැනීමට ඉදිරි දින කිහිපය තුළ ද දිවයින පුරා පිරවුම්හල් සහ සැකකටයුතු ස්ථාන ආශ්රිතව පරීක්ෂණ දැඩි කිරීමට උපදෙස් දී ඇත.
