නවක මන්ත්රීවරුන් බහුතරයකින් සමන්විත වත්මන් පාර්ලිමේන්තුව ආදර්ශමත් එකක් වනු ඇතැයි විශ්වාසයක් පවතින බව මල්වතු පාර්ශවයේ මහනායක අතිපූජ්ය තිබ්බටුවාවේ ශ්රී සිද්ධාර්ථ සුමංගල මහනාහිමියෝ පැවසුහ.
කතානායකවරයාට පවා බැණ වැදී හිරිහැර කරන තරමට පසුගිය කාලයේ දී මහජන නියෝජිතයින් ගේ හැසිරීම පාර්ලිමේන්තුව තුළ ඉතා පහත් තත්ත්වයට ඇද වැටුණු බවත් දැඩි ජනතා අප්රසාදයට පත් වු බවත් උන් වහන්සේ කීහ. උන්වහන්සේ පැවසුවේ විදෙස් රටවල පාර්ලිමේන්තු තුළ දැන් දැන් සිදුවන යම් විෂම හැසිරීම් දුටුවිට ඔවුන් ඒවා ඉගෙන ගත්තේ අපේ පාර්ලිමේන්තුවෙන්දැයි සැක සිතන බවය.
මල්වතු මහනාහිමියන් එසේ පැවසුවේ කතා නායක ආචාර්ය අශෝක රන්වල ඊයේ (24) පස්වරුවේ මල්වතු මහා විහාරයට ගොස් මල්වතු මහා නායක හිමියන් බැහැ දැක ආශිර්වාද ලබාගත් අවස්ථාවේදී ය.
වත්මන් ආණ්ඩුව වෙත ජනතාව බලය ලබා දුන්නේ විශාල බලාපොරොත්තු ගොන්නක් සමඟ බවත් රට යම් අර්බුදකාරී තත්ත්වයක තිබෙන මෙම අවස්ථාවේ ජනතා අපේක්ෂා ඉටු කිරීමට සියලු කණ්ඩායම් පක්ෂ භේද නොතකා එකට එකතු වී වැඩ කළ යුතුව තිබෙන බවත් මහනාහිමියෝ අවධාරණය කළහ.
පාර්ලිමේන්තුවේ ගෞරවය ආරක්ෂා කර ගනිමින් දැන් පක්ෂ විපක්ෂ භේද නොකතා සියලු දෙනා රටේ අනාගතය ගැන සිතා එකතු වී වැඩ කළ යුතු බවත් ජනතා අපේක්ෂාව වන්නේ ද එය බවත් උන්වහන්සේ කීහ.
මෙහි දී අදහස් දැක්වූ කතා නායක ආචාර්ය අශෝක රන්වල පැවසුවේ ආණ්ඩු පක්ෂය ගත්තත් විපක්ෂය ගත්තත් ඒ පත්වූ මන්ත්රීවරු නියෝජනය කරන්නේ ජනතාව බවය. ජනතාව ආදර්ශමත් පාර්ලිමේන්තුවක් බලාපොරොත්තු වන බව මෙම ජනවරම තුළ නිරූපනය වන බව කතා නායකවරයා කීවේය.
පක්ෂ විපක්ෂ භේදයකින් තොරව ස්වාධීනව කටයුතු කරමින් පාර්ලිමේන්තුවේ ගෞරවය ආරක්ෂා කිරීමට තමන් කැපවන බව ද කථානායකවරයා මල්වතු මහා නායක හිමියන් ඉදිරියේ සපථ වුනේය.
