මහනුවර අසේල කුරුළුවංශ –
රජයේ වියදම් කපා හැරීමේ ප්රතිපත්තිය යටතේ සුඛෝපභෝගි වාහන වෙන්දේසි කර සාමාන්ය වාහන පාවිච්චිය සඳහා යොමුවන බවට ආණ්ඩුව පවසද්දී මධ්යම පළාත් ආණ්ඩුකාරවරයාගේ සම්බන්ධීකරණ ලේකම්වරයා සුඛෝපභෝගි මොන්ටේරෝ රථයක් තම භාවිතය සඳහා ලබාදෙන ලෙස ආණ්ඩුකාරවරයාගෙන් ලිඛිතව ඉල්ලා තිබෙන බවට හිටපු පාර්ලිමේන්තු මන්ත්රී හා මධ්යම පළාත් හිටපු සෞඛ්ය හා ක්රීඩා ආමාත්ය තිළිණ බණ්ඩාර තෙන්නකෝන් චෝදනා කරයි.
මධ්යම පළාත් ආණ්ඩුකාර සම්බන්ධීකරණ ලේකම් ධුරයේ රාජකාරි කටයුතු සිදු කිරීම සඳහා අංක CP CAG 5831 දරන ජීප් රථය පෙබරවාරි මස 02 වැනිදා සිට තමන් වෙත ලබාදෙන ලෙසත් රියදුරු නොමැති අවස්ථාවල එය එය පදවාගෙන යෑමට අවසර ලබාදෙන ලෙසත් අදාළ ලිපිය මගින් සම්බන්ධීකරණ ලේකම්වරයා ඉල්ලා තිබෙන බවත් ඔහු පවසයි.
මහනුවර වේල්ස්පාක්හි පිහිටි හිටපු මන්ත්රීවරයාගේ නිවසේදී අද (26) පැවැති මාධ්ය හමුවකදී ඒ මහතා මේ බව අනාවරණය කළේය.
අදාළ ඉල්ලීම ඇතුළත් ලිපියක්ද මාධ්ය වෙත ලබාදෙමින් තිළිණ බණ්ඩාර තෙන්නකෝන් පැවසුවේ ජනාධිපති ලේකම් කාර්යාලයේ සුඛෝපභෝගි වාහන වෙන්දේසි කර රටට පෙන්වද්දී ආණ්ඩුකාරවරයාගේ සම්බන්ධීකරණ ලේකම්වරයාට සුඛෝපභෝගි වාහන නොමැතිව ගමන් බිමන් යෑමට නොහැකි වී තිබෙන බවය.
මේ සම්බන්ධයෙන් කළ විමසීමකදී මාධ්යම පළාත් ආණ්ඩුකාරවරයාගේ මාධ්ය ලේකම් ක්රිෂාන් වාසලගේ පැවසුවේ ආණ්ඩුකාර කාර්යාලයේ අභ්යන්තර ලිපියක් බාහිර පාර්ශව අතට පත්වීම සම්බන්ධයෙන් විමර්ශනයක් සිදු කිරීම සඳහා ආණ්ඩුකාර ලේකම්වරිය මහනුවර පොලීසියට පැමිණිල්ලක් සිදුකර තිබෙන බවය.
දිට්වා සුළි කුණාටුව හේතුවෙන් ඇතිවූ ආපදා තත්ත්වයට පත්වූ ස්ථාන නිරීක්ෂණය සඳහා විවිධ ප්රදේශ වලට ආණ්ඩුකාර සම්බන්ධීකරණ ලේකම්වරයා ඔහුට ලබාදී තිබූ කැබ් රථයෙන් ගමන් ගත් බවත් ඒ හේතුවෙන් ඇතිවූ කාර්මික දෝෂයක් යථා තත්ත්වයට පත්කරන තෙක් පමණක් තාවකාලිකව අදාළ සුඛෝපභෝගි මෝටර් ජීප් රථය ඉල්ලා තිබූ බවත් කී ක්රිෂාන් වාසලගේ මේ වනවිට එය කිසිවෙකුත් භාවිත නොකරන බවද අවධාරණය කළේය.
සම්බන්ධීකරණ ලේකම්වරයාගේ රාජකාරි ගමන් බිමන් සඳහා නිල වාහනයක් නොමැති නිසා තාවකාලිකව වාහනයක් ලබා ගැනීම සඳහා කළ ඉල්ලීම ඇතුළත් ලිපිය බාහිර පාර්ශවයක් වෙත පත්කර තිබෙන්නේ ඒ තුළින් දේශපාලන වාසියක් ලබා ගැනීමට බවද ඔහු පැවසුවේය.
