රාගම ශික්ෂණ රෝහලෙදී රෝගියෙකුට ලබා දුන් මතභේදාත්මක CO- AMOICLAV එන්න විෂවීමෙන් එම රෝගියා මිය ගොස් ඇති බව රාගම රෝහල් ආරංචි මාර්ග පවසයි.
කනේ කැක්කුමක් හේතුවෙන් රෝහල් ගතකිරීමෙන් පසු පසුගිය 22 දා රෝහල්ගත කර රෝහලේ 21 වැනි වාට්ටුවේ නේවාසිකව ප්රතිකාර ගනිමින් සිටියදී මෙම CO- AMOICLAV එන්නත රෝගියාට ලබා දී ඇති බවත් එන්නත ලබා දීමෙන් ස්වල්ප වෙලාවකට පසු ඔහු මියගොස් ඇති බවත් රෝහල් ආරංචි මාර්ග කියයි.
මෙසේ මියගොස් ඇත්තේ කන්දකැටිය ප්රදේශයේ පදිංචි 50 හැවිරිදි දෙදරු පියෙකි. මැද කනේ ආසාදනයක් හේතුවෙන් රෝහල්ගත කළ මෙම රෝගියාට මින් පෙර අවස්ථා 11ක CO- AMOICLAV එන්නත ලබා දී තිබුණ ද කිසිම අසාත්මිකතාවයක් පෙන්වා නොතිබුණු බව ද මෙම සිද්ධිය සම්බන්ධව අංශ කීපයකින් විධිමත් පරීක්ෂණයක් ආරම්භ කර ඇති බව ද රාගම ශික්ෂණ රෝහලේ අධ්යක්ෂ සම්පත් රණවීර ප්රකාශ කර තිබේ.
මෙම පරයේෂණවලින් අනතුරුව රෝගියා මියගොස් ඇත්තේ එන්නත විෂවීමෙන් ද නැද්ද යන්න පිළිබඳ නිශ්චිතව අනාවරණය වනු ඇතැයි ඔහු පවසා ඇත.
මිට අමතරව මේ සම්බන්ධව සෞඛ්ය අමාත්යාංශයේ ලේකම් විශේෂඥ වෛද්ය පාලිත මහීපාලගේ නියමයෙන් වෙනම පරීක්ෂණයක් ද ආරම්භ කර තිබේ.
CO- AMOICLAV එන්නත රටේ බරපතල විසංවාදයක් ඇති කළ මරණ තුනකට හේතු වූ එන්නතකි. ඖෂධ නියාමන අධිකාරිය ඉකුත් වසරේ අගෝස්තු මස 08 වැනිදා නිවේදනයක් නිකුත් කරමින් මේ බව ප්රකාශ කළේය.
ඉකුත් වසරේ ජූනි 30 දා පැවැති අවදානම් ඇගැයීම් අනුකමිටුව මෙම ඖෂධවල අහිතකර ප්රතික්රියා ඇතිවූ ඛාණ්ඩ 3ක් තාවකාලිකව භාවිතයෙන් ඉවත් කරන ලෙස නිර්දේශ කළේය.
එමෙන්ම ජාතික ඖෂධ තත්ත්ව ආරක්ෂණ පර්යේෂණාගාරය විසින් ඉදිරිපත් කරන ලද තත්ත්ව වාර්තා පදනම් කරගෙන එක් ඛාණ්ඩයක් භාවිතයෙන් ඉවත් කිරීමට කටයුතු කර ඇතැයි ද එහි දැක්විනි. – ලංකාදීප
