සඳුදා අලුයම දකුණු තුර්කියේ ඇති වූ රික්ටර් පරිමාණයේ 7.8 ක ප්රබල භූමිකම්පාවෙන් පසු තුර්කිය සහ සිරියාව පුරා මියගිය සංඛ්යාව අවම වශයෙන් 2,361 දක්වා ඉහළ ගොස් ඇතැයි විදෙස් මාධ්ය වාර්තා කරයි.
තුර්කියේ උප ජනාධිපති Fuat Oktay පවසන පරිදි, තුර්කියේ මුළු මරණ සංඛ්යාව 1,541 දක්වා ඉහළ ගොස් තිබේ. මේ වන විට තුර්කියේ පුද්ගලයින් 9,733 දෙනෙකු තුවාල ලබා ඇති බව ඔක්ටේ පවසයි.
සිරියාවේ මුළු මරණ සංඛ්යාව 820 කි. “සිරියන් ඇරැබ් නිව්ස් ඒජන්සි” (SANA) වාර්තා කරන අකාරයට රජයේ පාලන ප්රදේශයෙන් මරණ 430 ක් වාර්තා කරන අතර සිරියානු සිවිල් ආරක්ෂකයින් ( Syria Civil Defense ) ලෙස නිල වශයෙන් හඳුන්වන කණ්ඩායම පාලන ප්රදේශවල මරණ 390 ක් වාර්තා වී ඇති බව සඳහන් වේ.
සැබෑ ලෙසම මේ මහා ව්යසනයේ බරපතලම පීඩාව ඇදවැටී ඇත්තේ සිරියානු ජන සමාජය මතය. මෙම මාරක භූමි කම්පාව සිදුවන ව්යඹ දිග සිරියානු කලාපයේ මානුෂීය ආධාර මත යැපෙන මිලියන 4.1 ක ජනතාවක් සිටින බව එක්සත් ජාතීන්ගේ මානුෂීය කටයුතු සම්බන්ධීකරණ කාර්යාලය (OCHA) නිවේදනය කළේය.
මේ මානුෂීය ආධාර ලබන මිලියන ගණනක කණ්ඩායමේ අති බහුතරය කාන්තාවන් හා දරුවන්ය. මේ ගතවෙමින් ඇත්තේ සිරියාවේ අධික වර්ෂාව සහ දැඩි හිම පතනය සහිත රුදුරු ශීත ඍතුවකි. ඒ වටපිටාව තුළ ඇතිවූ මෙම බිහිසුණු භූ කම්පනය සමග උන් හිටි තැන් අහිමිව, ස්වකීය ප්රියයන් අහිමි වී හෝ බිහිසුනු ආපදාවට ලක් විමෙන් පසු ශිතල හිම මත ගල් වී මියැදෙන්නට නියම වුන අසරණ නොදරුවන් , කාන්තාවන් අතර සීඝ්රයෙන් කොලරාව වැනි වසංගත පැතිර යෑමේ අවදානමක් සම්බන්ධව එක්සත් ජාතීන්ගේ මානුෂීය කටයුතු සම්බන්ධීකරණ කාර්යාලය සඳහන් කරයි.
මේ භූමිකම්පාවෙන් පසු කාලය භූමි කම්පාව සිදුවූ වකවානුවට වඩා ඛේදවාචකයක් වීමට ඉඩ ඇති බවට ලකුණු පහළ වෙමින් ඇත.
