“ඔබ බය නැතුව දන්න භාෂාවක් කතා කරන්න. ශ්රී ලංකාවේ භාෂා තුනක් තියෙනවා. අනිවාර්යයෙන්ම ඔබ සෑම කෙනෙකුටම වගකීමක් තියෙනවා තමන් දන්න භාෂාවට අමතරව වෙනත් භාෂාවක් ඉගෙන ගැනීමට. තවත් කෙනෙක්ගෙ භාෂාවක් ඉගෙන ගන්නවා කියන්නේ ඔහුට හෝ ඇයට ගරු කරනවා කියන එකටයි.”
මහනුවර කතෝලික රදගුරු පදවියේ හිටපු සන්නිවේදන මාධ්ය අධ්යක්ෂක, පවුල් සේවා අධ්යක්ෂ සහ ගිහි දූත සේවා අධ්යක්ෂ ලෙස කටයුතු කළ වර්තමානයේ මහනුවර ආසන දෙව්මැදුරේ මීසම් පාලක තනතුරේ කටයුතු කරනු ලබන ගරු සුදත් රෝහණ පෙරේරා පූජා ප්රසාදීන් වහන්සේ පැවසුහ. .
උන්වහන්සේ එසේ පැවසුවේ කුරුණෑගල සාන්ත ආනා විද්යාලයේ ත්රි භාෂා දින වැඩසටහනේදී ප්රධාන ආරාධිත දේශනය පවත්වමිනි. ත්රිභාෂා සංස්කෘතිය ඔප නැංවෙන වෙන පරිදි විවිධ අංගයන්ගෙන් වර්ණවත් වූ විද්යාලයීය සිසු දරුවන්ගේ නිර්මාණාංග සහිත මෙම ශාස්ත්රීය සැසිය අමතමින් උන්වහන්සේ මෙසේ ද පැවසූහ.
” මගේ ගම් පළාත ජාඇල. ඒ ප්රදේශයේ ඉන්නේ සිංහල කතා කරන අය. ඒත් මට දෙමළ ඉගෙන ගන්න ඕන වුණා. මං ඒකට සෑහෙන්න උත්සාහ කළා. කාමරයේ දොරේ දෙමළ වචන ලියල ගහ ගත්තා නිතර ඇහැ ගැටෙන්න. ඒ විදිහට මම දැඩි අධිෂ්ඨානයෙන් කටයුතු කරලා, අසාර්ථක වුණ හැම වාරයකම උත්සාහ කරලා මං දෙමළ භාෂාව ඉගෙන ගත්තා.
වෙනත් භාෂාවක් කතා කරනවා කියන්නේ අපි එකිනෙකාට සමීප වෙනවා කියන එකයි. වෙනත් භාෂාවන් දැනගත් නිසා මට ලොකු ගමනක් යන්න පුළුවන් වුණා. ලොකු වැඩ කොටසක් කරන්න පුළුවන් උනා. තවත් භාෂාවක් ඉගෙන ගන්න එක ජීවිතයට ලොකු ජයග්රහණ අත්පත් කර දෙනවා.
අපි රටේ අවුරුදු 30ක යුද්ධයක් තිබුණා. ඒකට 50% ක හේතුව භාෂාව. භාෂාව දැනගෙන හිටියනම් මේ ප්රශ්න ගොඩාක් විසඳ ගන්න තිබුණා. භාෂාව නොදන්නකම නිසා එකිනෙකාට සමීප වෙන්න බැරි වුණා. අදහස් හුවමාරු කරගන්න බැරි වුණා. ඒක යුද්ධයට හේතු වුණා. භාෂාව නොදන්න නිසා බෙදෙන්න වුණා
භාෂාව දන්නවා නම් එකිනෙකා අතර ඉතාම සුහද පිළිගැනීමක් ඇතිවෙනවා. භාෂාවක් දැනගත්තම අනිත් අයගේ ප්රශ්නවලට ඇතුළු වෙන්න පුළුවන්. ඒවට විසඳුම් හොයාගන්න පුළුවන්. භාෂාවක් කතා කරන්න පුළුවන් නම් අපිට කෙනෙක් හදවතින්ම වැළඳ ගන්න පුළුවන්. භාෂාව නොදන්නාකම අපි තනිකරවනවා. අසරණ කරවනවා..
අනිවාර්යෙන්ම පාසල්වල දරුවන්ට මෙවැනි අවස්ථා ලබාදිය යුතුයි.” උන්වහන්සේ පැහැදිලි කළේ භාෂාව බධකයක් නොවූ තැන බෙදීම් ඇති නොවන බවය. වර්ණවත් අනාගතය සුබ සිහිනය සැබෑ කරගැනීම වෙනුවෙන් පදනම භාෂා සංස්කෘතිය මත පිහිටන බව උන්වහන්සේ පැහැදිලි කළහ.
මට්ටකැලේ, මස්කෙළිය වැනි ප්රදේශවල දමිළ කතෝලික ජනතාව වෙනුවෙන් කිසිදා විවේක නොගත් ප්රතිසංස්කරණ ක්රියාවලියක නිරත වුණු උන් වහන්සේ වර්තමානයේදී මහනුවර, නුවරඑළිය වැනි ප්රදේශවල කතෝලික ජනතාව වෙනුවෙන් ඉමහත් සේවයක් සපයමින් ඔවුන්ගේ ආධ්යාත්මය සුවපත් කරනමින් සිටිති..
කුරුණෑගල සාන්තානා විද්යාලයේ විදුහල්පති , පියතුමාණන් වන චන්දන හපුආරච්චි පූජා ප්රසාදීන් වහන්සේ ත්රි භාෂා දින වැඩසටහනේ පරමාර්ථය පැහැදිලි කරමින් සංවාදයට එක් වූහ.
“වෙනත් භාෂාවකට ගරු කළොත් වෙනත් ආගමකට ගරු කළොත් සංස්කෘතික හර පද්ධිතීන්ට ගරු කළොත් තමයි මනුෂ්යත්වය උද්දීපනය වන මනුෂ්යයෙක් බවට පත්වෙන්නේ… මේ වැඩසටහනින් අපි උත්සාහ කරන්නේ එවැනි මනුෂ්යත්වයෙන් පිරි දරු පිරිසක් බිහි කර ගැනීමටයි.
මේ වැඩසටහන වෙනුවෙන් පසුගිය සති කීපයේම හවස හතර පහ වනතුරුම පාසල තුළ උද්යෝගිමත් පරිසරයක් නිර්මාණය වුණා. පාසලක් විදියට අපි බලාපොරොත්තු වෙන්නේ එයයි.
භාෂාවකට ආදරය කරනවා කියන්නේ ඒ සංස්කෘතියට ගරු කරනවා කියන එකයි. ඕනෑම සංස්කෘතියක තියෙන්නේ හොඳ දේවල්. ඕනෑම භාෂාවක මූල පදනම වන්නේ එහි සංස්කෘතියයි. ඔබට විශ්වයේ වශයෙන් ජාත්යන්තරය ජයගන්නේ මේ ගුණය අවශ්ය වෙනවා. පාසල තුළ භාෂා දින වැඩසටහන් අපි බලාපොරොත්තු වන්නේ ඒ වටිනාකම ඔබට ලබා දෙන්නයි.
පාසල තුළ සති කීපයක් පුරා පැවැත්වූ ඉංග්රීසි දෙමළ සිංහල භාෂා ත්රිත්වයේ විවිධ තරගවලින් ජයගත් සිසුන්ට සහතික පත්ර හා ත්යාග ප්රදානය කිරීමද මෙහිදී සිදු විය.
