-
අපි ගල් අඟුරු ගෙන්වන්න වියදම් කළා වගේ දෙගුණයක් සත්ත්ව නිශ්පාදන ගේන්න වියදම් කළ ඉතිහාසයක් ඇති රටක්… මහාචාර්ය වසන්ත අතුකෝරල…
විනියම සංචිත බිඳ වැටී රට තුළ ගෙවුම් ශේෂය බරපතල අර්බුදයක් පවතින අවස්ථාවක බිත්තර ආනයනය සඳහා රජය ගෙන ඇත්තේ ඉතාම අදූරදර්ශී තීන්දුවක් බව ආර්ථික විද්වත්හු පෙන්වා දෙති.
මේ සම්බන්ධව අදහස් දක්වන පේරාදෙණිය විශ්වවිද්යාලයේ ආර්ථික හා සංඛ්යාන විද්යා දෙපාර්තමේන්තුවේ මහාචාර්ය වසන්ත අතුකෝරල පවසන්නේ යම් භාණ්ඩයක මිල විවිධ කාලවකවානුවල සිදුවන මිල උච්ඡාවචනයට පිළිතුර එම භාණ්ඩ ආනයනය කිරීම නොව, එම තත්ත්ව රට තුළ කළමනාකරණය කරගැනීමට අවශ්ය කෙටි කාලීන, මධ්ය කාලීන හා දීර්ඝ කාලීන වැඩපිළිවෙළක් බවය.
මහාචාර්යවරයා පෙන්වා දෙන්නේ 2020 වසර තුළ පමණක් මේ ආකාරයට බිත්තර ආනයනය සඳහා ඩොලර් පනස් දහසකට ආසන්න මුදලක් වැය කර තිබුණු බවය.
2021 වසර තුළ පමණක් සමස්ථයක් වශයෙන් සත්ත්ව නිශ්පාදන රට තුළට ගෙන්වීමට මේ රට වියදම් කළමුළ ඩොලර් මිලියන 420ක් බවත් එය රටේ ගල් අඟුරු ආනයනයට වැය කළ මුදලට වඩා දෙගුණයක විනිමය ප්රමාණයක් බවත් මහාචාර්යවරයා පෙන්වා දුන්නේය.
ඔහු පෙන්වා දෙන්නේ මේ සියලුම නිශ්පාදන රට තුළ කළ හැකි බවත් ඒ සඳහා අවශ්ය වන්නේ වැඩපිළිවෙළක් පමණක් බවත්ය.
“ රටේ යම් භාණ්ඩයක හිඟ වුනොත් ආණ්ඩුව ඒ භාණ්ඩය කරන්නේ ආනයනය කිරීම. ඉන් දේශීය නිශ්පාදකයන්ට ඇතිවෙන්නේ ඍණ බලපෑමක්. එයින් කිසිම ආකාරයකට . දේශීය නිශ්පාදනය ප්රවර්ධනය කිරීම වෙන්නෙ නෑ.“
“ සැපයුමේ උච්චාවචන පාලනය කිරීමට යම් වැඩපිළිවෙළක් ඕන. මෙවැනි තත්ත්වයක් තුළ බිත්තර ආනයනය කිරීම නෙමෙයි කළ යුත්තේ. දේශීය නිශ්පාදන වැඩිකිරීමට කටයුතු කිරීම.
“ මොකද අපි ඉන්නේ බරපතල ගෙවුම් ශේෂ අර්බුදයක. රටේ විනිමය සංචිත බිඳවැටිලා. එහෙම වෙලාවක බිත්තරත් රටින් ගෙන්වන්න ඩොලර් වියදම් කිරීමට ගන්න තීරණය කිසිසේත් ආර්ථික වශයෙන් යහපත් එක්කක නෙමෙයි.“ මහාචාර්යවරයා පෙන්වා දුන්නේය.
මේ සම්බන්ධව ජාතික සත්ව නිෂ්පාදකයන්ගේ එකමුතුවේ කැඳවුම්කරු සුජීව ධම්මික ලංකාසරට අදහස් දක්වමින් පැවසුවේ මේ සිදුකරන අදූරදර්ශී තීන්දුව හුදු ව්යාපාරිකයන් කීප දෙනෙක්ගේ ආර්ථික ලාභය වෙනුවෙන් අගාධයට වැටුණු රටක් තවදුරටත් විනාශ කරන ආකාරයේ තීන්දුවක් බවය.
මේ බිත්තර ආනයනය සඳහා වැය කරන මුදල රටේ සත්ත්ව නිශ්පාදනය කරන ගොවි ප්රජාව සංවර්ධනය සඳහා යෙදවීමට තරම් මේ ආණ්ඩුවට මොළය පෑදේ නම් තව සති කීපයකින් මේ ප්රශ්නය විසඳෙනවා පමණක් නොව කර්මාන්තය ස්ථාවර වෙන බවත් පෙන්වා දුන්නේය.
මේ කැබිනට් තීන්දුව ක්රියාත්මක කර බිත්තර ආනයනය සිදුකරනු ලැබුවහොත් මේ රටේ බිත්තර කර්මාන්තය යළි හිස එසවිය නොහැකි සේ බිඳ වැටෙන්නට නියමිත බවත් ඔහු පෙන්වා දුන්නේය.
