මනම්පිටිය නිමල් ජයරත්න –
සිරිපුර බාල පොහොර ගබඩාවට සම්බන්ධ යැයි සැකකරන, ලේබල් හා මිල ගණන් වෙනස් කරන ලද බාල පොහොර මිටි පනහකින් යුත් ලොරි රථයක් පොළොන්නරුව මඩකලපුව ප්රධාන මාර්ගයේ සෙවණපිටිය ප්රදේශයේදී අද (14 ) සවස 4.00 ට සැකකරුවන් තිදෙනකු සමග අත්අඩංගුවට ගත් බව පොළොන්නරුව කොට්ඨාස අපරාධ විමර්ශන අංශය සඳහන් කරයි.
පොලිස් විශේෂ කාර්යාංශයට ලද තොරතුරට අනුව, පොළොන්නරුව කොට්ඨාස අපරාධ විමර්ශන අංශයේ නිලධාරීන් පොළොන්නරුව සෙවණපිටිය නගරයේ ක්ෂණික මාර්ග බාධකයක් යොදවා මෙම ලොරි රථය සහ පොහොර තොගය අත්අඩංගුවට ගත් බව පොළොන්නරුව කොට්ඨාස අපරාධ අංශයේ ස්ථානාධිපති පොලිස් පරීක්ෂක ඒ.ටී. බණ්ඩාර කීවේය.
අත්අඩංගුවට ගත් සැකකරුවන් අවුරුදු 20, 38, 44 යන වයසේ පසුවන සිරිපුර ප්රදේශයේ පදිංචි කරුවන් බවද ඒ පිළිබඳ පරීක්ෂණ සිදුකරන පොලිසිය සඳහන් කරයි.
වැලිකන්ද නාගස්තැන්න ප්රදේශයේ සිට සිරිපුර මීට පෙර බාල පොහොරවලට අත්අඩංගුවට ගත් හිමිකරුගේ පොහොර ගබඩාවට මෙම පොහොර තොගය ප්රවාහනය කරමින් සිට ඇත.
අත්අඩංගුවට ගත් පොහොර තොගයේ සාම්පල් ලබාගෙන පොහොර ලේකම් කාර්යාලයට ලබාදීමෙන් පසු මෙම සැකකරුවන් සහ පොහොර තොගය පොළොන්නරුව මහේස්ත්රාත් අධිකරණයට ඉදිරිපත් කිරීමට කටයුතු කරන බවද පොළොන්නරුව කොට්ඨාස අපරාධ විමර්ශන අංශය පවසයි.
පොළොන්නරුව ජ්යෙෂ්ඨ පොලිස් අධිකාරි බුද්ධික මනතුංගගේ සහ කේ.පි.ජේ. ජාගොඩගේ උපදෙස් මත, පොළොන්නරුව කොට්ඨාස අපරාධ විමර්ශන අංශයේ පොලිස් පරීක්ෂක, ඒ.ටි. බණ්ඩාර, 42229 රංග, 61580 චමින්ද, 82748 සඳකැලුම්, 88883 ලක්ෂාන්, 34968 නිශ්ශංක, 609 සමන්මදු යන පොලිස් නිලධාරිහු මෙම වැටලීම සිදු කළහ.
