මනම්පිටිය නිමල් ජයරත්න –
ශ්රී ලංකා නිදහස් පක්ෂයෙන් මෙවර පළාත් පාලන මැතිවරණයේ දි දිඹුලාගල කොට්ඨාසයෙන් දිඹුලාගල ප්රාදේශීය සභාවට තරග කරන බීමත් අපේක්ෂකයෙක් තමන් සමග ආ කණ්ඩායමකට පොලිසියෙන් ගල් ප්රහාර එල්ල කළ බවට චෝදනා කරමින් මනම්පිටිය මඩකලපුව හන්දියේ කලහාකාරී ලෙස හැසිරීම නිසා පොලිස් අත්අඩංගුවට පත් වී තිබේ.
මෙම බීමත් අපේක්ෂකයා සහ ඔහුගේ සහායකයින් පස් දෙනෙක් අද (15) උදේ මෙසේ පොලිස් අත්අඩංගුවට පත් වී ඇත.
මෙලෙස අත්අඩංගුවටගෙන ඇත්තේ දිඹුලාගල ප්රාදේශීය සභාවේ සේවකයෙකු සහ මනම්පිටිය, මාගංතොට යන ගම්මානවල පදිංචි අවුරුදු විස්සත්, තිහත්, යන වයසේ පදිංචිකරුවන් බව මනම්පිටිය පොලිස් ස්ථානාධිපති පොලිස් පරීක්ෂක අසේල සරත් කුමාර අප කළ විමසීමකදී සඳහන් කළේය,
මෙම කණ්ඩායම් සමග බීමතින් සිටි නාවික හමුදා සෙබළකු ප්රදේශයෙන් පලාගොස් ඇති බවද ඔහු අත්අඩංගුවට ගැනීම සඳහා විමර්ශන කටයුතු ආරම්භ කර ඇති බවද පොලිසිය කියයි.
බීමතින් අශෝභන අයුරින් හැසුරුණු අදාල අපේක්ෂකයා සමඟ සිටි කණ්ඩායම පොලිසියට බැනවදිමින්, ගම්මුන් හා මාධ්ය ගෙන්වා තමන්ට පොලිසිය ගල් ප්රහාර එල්ල කරන බවට අසත්ය චෝදනා එල්ල කළ බවත් පොලිසිය හා ගම්වැසියන් බිඳවා සමඟ විශාල ගැටුමක් ඇති කිරීමට සැලසුම් සකස් කර ඇති බවද පොලිස් පරීක්ෂණ වලින් අනාවරණය වන්නේ යැයි මනම්පිටිය පොලිසිය පැවසුවේය.
අත්අඩංගුවට ගත් ශ්රී ලංකා නිදහස් පක්ෂය ප්රාදේශීය අපේක්ෂකයා සමග පස්දෙනා පොලිස් ඇප මත නිදහස් කර ඇති අතර හෙට (16) පොලොන්නරුව මහේස්ත්රාත් අධිකරණය වෙත ඉදිරිපත් කිරීමට නියමිතව ඇත.
පොලොන්නරුව ජේෂ්ඨ පොලිස් අධිකාරිී ඉන්දික ද සිල්වා, වැලිකන්ද ප්රදේශය භාර සහකාර පොලිස් අධිකාරී ශානක ද සිල්වාගේ උපදෙස් පරිදි මනම්පිටිය පොලිස් ස්ථානාධිපති පොලිස් පරීක්ෂක අසේල සරත් කුමාර ඇතුළු පොලිස් නිලධාරීන් කණ්ඩායමක් මේ පිළිබඳ වැඩිදුර පරීක්ෂණ සිදුකරයි,
