පිටකොටුව දෙවන හරස් වීදියේ රෙදි පිළි වෙළෙඳසැලක පසුගිය 27 දා ඇති වූ ගින්නෙන් පිළිස්සුම් තුවාල ලද තරුණියක් අද(03) කොළඹ ජාතික රෝහලේ දී මිය ගොස් තිබේ.
පොලීසිය පැවසුවේ ගින්නනට හසුව බරපතළ තත්ත්වයෙන් පසු වූ ඇය කොළඹ ජාතික රෝහලේ දැඩි සත්කාර ඒකකයේ ප්රතිකාර ලබමින් සිටි බවය.
මෙසේ මියගොස් ඇත්තේ වටවල ප්රදේශයේ පදිංචිව සිටි 22 හැවිරිදි තරුණියක් බව සඳහන් වෙයි.
මෙම ගින්නෙන් පුද්ගලයින් 19 දෙනෙකු තුවාල ලබා කොළඹ ජාතික රෝහලට ඇතුළත් කර තිබුණි.
පිටකොටුව දෙවැනි හරස්වීදියේ සයමහල් ගොඩනැගිල්ලක පිහිටි රෙදිපිළි අලෙවිසලක පසුගිය 27 දා පෙරවරු 09.30ට පමණ මෙම ගින්න හටගෙන තිබුණේ වෙළෙඳසල විවෘත කර මඳ වේලාවකින් පසුය.
පසු ව කඩිනමින් ක්රියාත්මක වූ කොළඹ ගිනි නිවීම් සේවා දෙපාර්තමේන්තු නිලධාරීන් 45 දෙනෙක් සහ ගිනි නිවීමේ රථ 11ක් එක්ව කළ මෙහෙයුමින් පැය 02ක් තුළ ගින්න පාලනය කර ගින්නට කොටු වූ සේවක පිරිස මුදා ගැනීමට හැකි විය.
පොලිසිය පැවසුවේ උදෑසන වෙළෙඳසල විවෘතකර දුම් ඇල්ලීමේ දී ඩීසල් බහාලුමක් ගිනිගෙන එය විදුලි ජනන යන්ත්රය දක්වා ව්යාප්ත වීමෙන් ගින්න හටගෙන ඇති බවය.
