පාස්කු ප්‍රහාරයේ මට්ටමින් නොවුනත් රාමසාන් – අලුත් අවුරුදු කාලයේ අන්වාදී ත්‍රස්ත ක්‍රියා ඇතිවිය හැකියි… ආරක්ෂාව තර කරන බව පොලිස්පති කියයි!

එළඹෙන රාමසාන් උත්සවය සහ සිංහල හා හින්දු අලුත් අවුරුදු සැමරුම් හේතුවෙන් දැඩි ආරක්ෂක විධිවිධාන අවශ්‍ය බව පොලිස්පති දේශබන්දු තෙන්නකෝන්  අවධාරණය කළේය.

ඇමාත්‍ය ආරක්‍ෂක කොට්ඨාශයේ පැවති උත්සවයකට එක්වෙමින් පොලිස්පතිවරයා ප්‍රභූ ආරක්‍ෂාව සහ ජාතික ආරක්‍ෂාව කෙරෙහි අවධානය යොමු කිරීමේ වැදගත්කම අවධාරණය කළේ  අන්තවාදී ත්‍රස්තවාදී ප්‍රහාරවල ගෝලීය තර්ජනය අවධාරණය ලක් කරමිනි.

“අන්තවාදී සහ ත්‍රස්තවාදී ප්‍රහාර ලොව පුරා බොහෝ විට සිදුවන්නේ අනපේක්ෂිත ලෙසයි. මෙය අවදියෙන් සිටීමේ අවශ්‍යතාවය අවධාරණය කරනවා…”  පොලිස්පතිවරයා පැවසීය.

මේ අතර, මහජන නොසන්සුන්තාව ඇති කිරීම සඳහා දේශපාලන, ආගමික සහ සංස්කෘතික අංශවලට පහර දීමට ඇතැම් පිරිස් උත්සාහ කරන බවද පොලිස්පතිවරයා පැවසීය.

“රාමසාන් උත්සවය සහ සිංහල හා හින්දු අලුත් අවුරුද්දේ ආරක්ෂාව සම්බන්ධයෙන් විශේෂ අවධානයක් යොමු කළ යුතුයි. ආරක්ෂක තත්ත්වයන් සීඝ්‍රයෙන් වෙනස් විය හැකියි. පාස්කු ප්‍රහාරයේ පරිමාණයෙන් නොවුණත් වෙනත් සිදුවීම් ඇති විය හැකියි. අන්තවාදය, ත්‍රස්තවාදය වැනි සමාජ ප්‍රශ්නවලට අපි අවධානය යොමු කළ යුතුයි. ,” පොලිස්පතිවරයා පැවසීය.

මේ අතර, රාමසාන් සමයේදී මුස්ලිම් පල්ලි සඳහා විශේෂ ආරක්ෂක විධිවිධාන ක්‍රියාත්මක කර ඇති අතර, ආරක්ෂක නිලධාරීන් 7,500 කට අධික පිරිසක් එම උත්සාහයට සම්බන්ධ වී ඇති බව පොලිසිය පවසයි.

අප්‍රේල් 11 රාමසාන් උත්සවය වෙනුවෙන් පොලිසිය, විශේෂ කාර්ය බළකාය (STF) සහ ත්‍රිවිධ හමුදාව සම්බන්ධ ඒකාබද්ධ ආරක්‍ෂක වැඩපිළිවෙළක් ක්‍රියාත්මක කරන ලෙස පොලිස්පති දේශබන්දු තෙන්නකෝන්   උපදෙස් දී ඇතැයි පොලිසිය පවසයි.

සෑම පොලිස් වසමකදීම මුස්ලිම් පල්ලි මවුලවිවරුන් හමුවීමෙන් පසු මෙම ආරක්ෂක සැලැස්ම සකස් කර ඇත.

දිවයින පුරා ආගමික වතාවත් පැවැත්වෙන මුස්ලිම් පල්ලි 2,453 ක පොලිස් නිලධාරීන් 5,580 ක්, විශේෂ කාර්ය බළකායේ නිලධාරීන් 510 ක් සහ ත්‍රිවිධ හමුදා නිලධාරීන් 1,260 ක් යොදවා ඇති බව පොලිසිය පවසයි. –  ඩේලි මිරර්