ඊයේ (02) උදෑසන 15 හැවිරිදි දරුවා විසින් වැලිසර දී සිදුකළ රිය අනතුරින් තුවාල ලැබ රෝහල්ගතව සිටින තවත් අයෙකුගේ තත්වය බරපතල බව රෝහල් ආරංචි මාර්ග වාර්තා කළේය.
මෙසේ බරපතල තත්වයේ පසුවන්නේ මෙවර උසස්පෙළ විභාගය සඳහා පෙනී සිටි පාසල් සිසුවෙකි. ඔහු අනතුරින් මිය ගිය 51 හැවිරිදි පුද්ගලයාගේ ඥාති පුත්රයෙකි.
අනතුරින් ජීවිතක්ෂයට පත්ව ඇති පුද්ගලයා 51 හැවිරිදි ලී වැඩපොළක සේවකයෙකි.
මියගිය පුද්ගලයාගේ ඥාතීහු අද මහබාගේ පොලිස් ස්ථානය අසලට රැස් වී මේ අනතුරු සිදුකළ අයට එරෙහිව නීතිය ක්රියාත්මක කරන ලෙස බලධාරීන්ගෙන් ඉල්ලා සිටියේය.
අනතුර සම්බන්ධයෙන් රාගම ප්රදේශයේ පාසලක ඉගෙනුම ලබන 16 හැවිරිදි දරුවෙක් හා එම වාහනයේ හිමිකරුවන පාසල් සිසුවාගේ පියා ද මේ වනවිට ඉන්නේ පොලිස් අත්අඩංගුවේය. ඔවුන් අද (05) වත්තල අධිකරණය වෙත ඉදිරිපත් කිරීමට නියමිතය. මේ පුද්ගලයා මහබාගේ ප්රදේශයේ ස්වර්ණාභරණ වෙළෙඳසල් හිමියෙකි. අනතුර සිදුවන අවස්ථාවේ දී පාසල් සිසුවාගේ සොයුරිය ද වාහනයේ සිට ඇත.
පොලිසිය ඉදිරියට රැස් වූ මිය අයගේ ඥාතීන් වෙනුවෙන් ඔහුගේ දියණිය මාධ්ය වෙත කියා සිටියේ ධනය බලය ඇති පුද්ගලයන් ඉදිරියේ මින් පෙරත් තමන් වැනි පුද්ගලයින් බරපතල අසාධාරණකම්වලට ලක් වූ බවය.
දැන් තමන් ඇතුළු මුළු පවුලේම අනාගතය අවසන් බව කී ඇය ධනයට බලයට යට නොවී නීතිය නිසි ලෙස ක්රියාත්මක කරන ලෙස ඒ දියණිය මේ රටෙන් ඉල්ලා සිටියාය.
