පවතින දේශපාලනික සහ ආර්ථික අර්බුදය හේතුවෙන් නිර්මාණය වී ඇති අසහනකාරී තත්ත්වය පිළිබඳව අද (05) දින පාර්ලිමේන්තුවේ පක්ෂ නායකයින් රැස්වී කතා බහට ලක් කළද ඔවුන්ට ඉදිරියේ දී ගත යුතු පියවර පිළිබඳව නිශ්චිත තීරණයක් ගැනීමට අපොහොසත් ව ඇති බව පාර්ලිමේන්තු ආරංචි මාර්ග සඳහන් කරයි.
ඒ අනුව කථානායකවරයාගේ ප්රධානත්වයෙන් පැවති මෙම රැස්වීම අවසානයේ පක්ෂ නායකයින් එකඟ වී ඇත්තේ හෙට සහ අනිද්දා දෙදින මේ පිළිබඳව පාර්ලිමේන්තුවේ විවාදයක් කර එයින් පසුව ගන්නා පියවර පිළිබඳව තීරණයකට එලඹීමටය.
මෙම රැස්වීමේදී විපක්ෂ නායක සජිත් ප්රේමදාස පවතින තත්ත්වය මත විධායක ජනාධිපති ක්රමය අහෝසි කිරීම සඳහා අවශ්ය කටයුතු වහා සිදු කළ යුතු බවට අවධාරණය කර තිබේ. ඔහු එහිදී පෙන්වා දී ඇත්තේ සතියක් ඇතුළත මෙම ව්යවස්ථාමය වෙනස පාර්ලිමේන්තුවට සිදු කළ හැකි බවය.
වර්තමාන ජනාධිතිවරයා ඉල්ලා අස් නොවන පසුබිමක් තුළ ඔහු ගේ විධායක බලතල කප්පාදුවකට ලක් කිරීම පිළිබඳව ප්රේමදාස මහතා කරුණු දක්වා ඇත.
එසේම මෙහිදී අවධානයට ලක්ව ඇති තවත් යෝජනාවක්ව ඇත්තේ පාර්ලිමේන්තුව විසුරුවා හැරීමය. එහෙත් රජයේ පාර්ශ්වයෙන් ඉදිරිපත් වී ඇති අදහසවී තිබුණේ එලෙස පාර්ලිමේන්තුව විසුරුවා හැරියහොත් යලි මහා මැතිවරණයකට යාම සඳහා පවතින ආර්ථික තත්ත්වය තුළ අසීරු බවය. කඩදාසි ටික, ඩීසල් ටික, විදුලිය, නැති පරිසරයක මැතිවරණ සිදුකළ නොහැකිබවත්, විශේෂයෙන් මේ සඳහා වැය වන වියදම දැරිය නොහැකි බවත් පෙන්වා දී තිබේ.
එමෙන්ම රටේ මේ වනවිට උණුසුම්ව පවතින මහජන විරෝධතා හමුවේ කළ යුතු කඩිනම් පියවර පිළිබඳව කිසිදු දේශපාලන පක්ෂ නායකයකුගෙන් සාධනීය කඩිනම් විසඳුමක් පැමිණ නැති බව පළ වන අතර මේ තත්ත්වය තුළ හෙටත් අනිද්දාත් විවාද කොට තීරණකට එලඹීමට පක්ෂ නායකයන් එකඟතාවයකට පැමිණ ඇත.
හෙට පෙරවරු 10ට යළි පාර්ලිමෙන්තුව රැස්වීමට නියමිතය
