ප්රකාශයක් සටහන් කර ගැනීම සඳහා හිටපු නීතිපති දප්පුල ද ලිවේරා අද (19) පෙරවරුවේ ත්රස්ත විමර්ශන කොට්ඨාසය වෙත කැඳවා තිබේ.
පාස්කු ඉරිදා ත්රස්ත ප්රහාරය සම්බන්ධයෙන් හිටපු නීතිපති දප්පුල ද ලිවේරා විශ්රාම යාමට දින කිහිපයකට පෙර කළ ප්රකාශයක් පිළිබඳව ඔහුගෙන් ප්රකාශයක් සටහන් කර ගන්නා ලෙස නීතිපතිවරයාට දැනුම් දුන් බව අධිකරණ අමාත්ය ආචාර්ය විජයදාස රාජපක්ෂ ඊයේ (18) ප්රකාශ කළේය.
“2019 අප්රේල් ප්රහාරය සම්බන්ධයෙන් මහා කුමන්ත්රණයක් ක්රියාත්මක වන බව” හිටපු නීතිපති දප්පුල ද ලිවේරා කළ ප්රකාශයකින් පසු විමර්ශන සම්බන්ධයෙන් යම් තරමක සැක සංකාවක් ඇතිවී තිබෙන බව ඇමතිවරයා පැවසීය.
හිටපු නීතිපතිවරයා විශ්රාම යාමට දින කිහිපයකට පෙර මෙම ප්රකාශය කළ බව පැවසූ අධිකරණ අමාත්යවරයා සඳහන් කළේ පරීක්ෂණ මට්ටම ප්රමාණවත් නොවන්නේ නම් එවකට නීතිපතිවරයා ලෙස කටයුතු කළ දප්පුල ද ලිවේරා විසින් පොලිසිය කැඳවා වැඩිදුර පරීක්ෂණ පවත්වන ලෙස නියෝග කළ යුතුව තිබූ බවය.
ඊට සම්බන්ධ පිරිස් පිළිබඳව මහේස්ත්රාත් අධිකරණයට ගොස් කරුණු දැක්වීමට සහ ඊට අවශ්ය නියෝග මහේස්ත්රාත් අධිකරණයෙන් ලබා ගැනීමට හිටපු නීතිපතිවරයාට බලය තිබුණු බවද ඔහු සඳහන් කළේය.
හිටපු නීතිපතිවරයා එවැනි ප්රකාශකයක් ශ කළේ කුමන තොරතුරු මතද, එවැනි ප්රකාශයක් කළේ ඇයිද යන්න සොයා බැලීම සඳහා ඔහුගෙන් ප්රකාශයක් සටහන් කර ගන්නා ලෙස වත්මන් නීතිපතිවරයාට තමන් දැනුම් දුන් බව අධිකරණ අමාත්යවරයා පැවසීය.
2021 මැයි මස මුලදී හිටපු නීතිපති දප්පුල ද ලිවේරා පැවසුවේ “2019 අප්රේල් ප්රහාරය සම්බන්ධයෙන් මහා කුමන්ත්රණයක් පවතී” යනුවෙනි.
2019 අප්රේල් 21 ප්රහාරයේ නායකත්වය පිළිබඳ නිගමනයකට එළඹීම සඳහා සාක්ෂි සහ බුද්ධි තොරතුරු සහ සියලුම අදාළ තොරතුරු හොඳින් ඇගයීමට ලක් කළ යුතු බවත් ඔහු සඳහන් කළේය.
රාජ්ය බුද්ධි සේවයේ වේලාවන්, ඉලක්ක, ස්ථාන, ප්රහාර එල්ල කළ ක්රම ඇතුළු අනෙකුත් තොරතුරු ඇතුළත් සමස්ථය මහා කුමන්ත්රණයක් ක්රියාත්මක වූ බවට පැහැදිලි සාක්ෂියක් බවද හිටපු නීතිපතිවරයා වැඩිදුරටත් පැවසීය.
