ඉදිරියේදි පැවැත්වෙන පළාත් පාලන මැතවරණය සඳහා පොදු ජන පෙරමුණ සහ එක්සත් ජාතික පක්ෂය එක්ව තරඟ කිරීම සම්බන්ධයෙන් මේ වනවිට මූලික එකඟතාවක ට පැමිණ ඇති නමුත් මෙම ඡන්දය කල් දමා ගැනීම සදහා නීත්යනුකූලව ගත හැකි පියවර තුනක් පිළිබඳ ව පොදු ජන පෙරමුණ විසින් ජනාධිපතිවරයාගේ පාර්ශ්වය වෙත යෝජනා කර ඇතැයි දේශපාලන ආරංචි මාර්ග සඳහන් කරයි. වර්තමානයේ පවතින තත්ත්වය අනුව ගම් මට්ටමන් පොදු ජන පෙරමුණ කෙරෙහි පවතින අප්රසාදය සහ පාක්ෂිකයන් තුළ පවතින කළකිරීම මත මැතිවරණයකදී මුහුණ දීමට සිදුවන අවාසිදායක තත්ත්ව සලකා මේ යෝජනා පිළිබඳව අවධානය යොමු කර ඇති බව මෙම ආරංචි මාර්ග අනාවරණය කළේය.
මේ අනුව ඉදිරි පළාත් පාලන මැතිවරණය සම්බන්ධයෙන් පාර්ලිමේන්තු තේරීම් කාරක සභාවක් පත් කිරිමට ආණ්ඩුඩ උත්සාහ දැරීම එක් යෝජනාවකි. මේ සම්බන්ධයෙන් දැනටමත් විපක්ෂයේ පක්ෂ වෙත තොරතුරු ලැබී ඇති අතර මෙම සතියේදි පැවැත්වන පක්ෂ නායක රැස්වීමේ දී මේ සම්බන්ධයෙන් විපක්ෂය තදින්ම විරුද්ධ වන බවට විපක්ෂ නායක සජිත් ප්රේමදාස මහතා මේ වනවිටත් ප්රසිද්ධියේම ප්රකාශ කර ඇත. මෙයට අමතරව පවතින ආර්ථික තත්ත්වය ස්බන්ධයෙන් සලකා බලා ඊට වැයවන වියදම් හේතුවෙන් මේ මොහොතේ ඡන්දයක් පැවත්වීම නුසුදුසුය යන මතය ඉස්මතු කිරීමද තවත් යෝජනාවක් ලෙස සඳහන වන අතර ඉදිරියේදී පැවැත්වීමට නියමිත උසස් පෙළ විභාගය සහා මෙම මැතිවරණය මඟින් යම් බලපෑමක් ඇතිවිය හැකි බවට ශ්රේෂ්ඨාධිකරණය හරහා යම් තීන්දුවක් ලබා ගැනීමේ හැකියාව පිළිබඳවද අවධානය යෙමු කර ඇතැයි මෙම ආරංචි මාර්ග සඳහන් කළේය.
පසුගිය සතියේ රටේ විවිධ ප්රදේශවල පොදු ජන පෙරමුණු නායකයින් එම පක්ෂයේ ප්රධාන කාර්යාලයට ගෙන්වා සාකච්ඡා කිරීමට පක්ෂයේ නිර්මාතෘ හිටපු අමාත්ය බැසිල් රාජපක්ස මහතා කටයුතු කළ අතර එහිදි බොහෝ පිරිසක් තම තමන්ගේ ප්රදේශවල බිම් මට්ටමේ තත්ත්වය පවතින ආර්ථික දුෂ්කරතා හේතුවෙන් පොදු ජන පෙරමුණු රජය පිළිබඳව ප්රකාශ වී ඇති අප්රසාදය පිළිබඳව දන්වා ඇති අතර පොදු ජන පෙරමුණේ මන්ත්රිවරුන් පිරිසක් ස්වාධීන වීම තුළ අදළ පළාත්වල සැලිකිය යුතු ජනතාවක් ඔවුන් සමඟ කටයුතු කිරීමද හේතු වී ඇතැයි මෙම ආරංචි මාර්ග පවසසි. එසේම මෙලෙස ස්වාධීන වූ මන්ත්රිවරුන් බොහොමයක් ප්රදේශයේ ආසන සංවිධායකයන් බැවින් ඔවුන්ගේ ඉවත් වීත් සමඟ බිම් මට්ටමේ යාන්ත්රණයේ දැවැන්ත පසුබෑමක් පවතින බවද පක්ෂ අරංචි මාර්ග ලංකාසරට අනාවරණය කළේය.
කෙසේ වුවද තවදුරටත් සම්බන්ධයෙන් සාකච්ඡා සිදුවනු ඇතියි බව ලංකාසරට අදහස් දැක්වූ පක්ෂ නියෝජිතයෙක් ප්රකාශ කළේය.
