කොළඹ 05 හැව්ලොක් පාරේ පිහිටි පරිසරය සම්බන්ධයෙන් ක්රියාත්මක වන රාජ්ය නොවන සංවිධානයක ලේකම්වරියකට බංගලාදේශ ජාතික විධායක අධ්යක්ෂකවරයෙක් විසින් එම කාර්යාලය තුළ දී කළ පහරදීමක් සම්බන්ධයෙන් බම්බලපිටිය පොලීසිය පුළුල් විමර්ශනයක් ආරම්භකර තිබේ.
මෙම පහරදීම සිදුව ඇත්තේ පෙරේදා (23)ය.
පහරදීම ගැන මුල්ම පැමිණීල්ල පොලීසියට ඉදිරිපත්කර ඇත්තේ බංගලාදේශ ජාතික විධායක අධ්යක්ෂවරයාය. ආචාර්යවරයෙක් වන ඔහු පොලීසියට පැමිණිලිකරමින් පවසා ඇත්තේ තමාට ලේකම්වරිය විසින් පහරදුන් බව ය.
බත්තරමුල්ලේ පදිංචිකාරියක් වන ලේකම්වරිය වසර 12ක පමණ කාලයක් කොන්ත්රාත් පදනම යටතේ මෙම සංවිධානයේ සේවයකර ඇතැයි ද, ඇගේ කොන්ත්රාත්තුව දීර්ඝ නොකිරීමට ආයතනය තීරණයකර ඇයට ඒ බව දැනුම් දුන් විට ඉන් උරණ වී ඇය ඔහුට පහර දුන්නේ යැයි ද බංගලාදේශ ජාතික විධායක අධ්යක්ෂවරයා පොලීසියට පවසා තිබේ.
ලේකම්වරිය ඊට පසු පොලිස් ස්ථානයට පැමිණ පැමිණිලක් කරමින් සඳහන් කර ඇත්තේ බංගලාදේශ ජාතික විධායක අධ්යක්ෂවරයා තමාට පහරදුන් බවකි.
ඔහු විසින් තමාව තල්ලුකර තුවාල කළ බවද ඇය පොලීසිය හමුවේ පවසා තිබේ. රෝහල් ගත වීමට අවශ්ය බව සඳහන් කරමින් පැමිණිල්ලෙන් පසු අධිකරණ වෛද්ය පෝරමයක්ද ලබාගෙන ඇය පොලිස් ස්ථානයෙන් පිටව ගොස් ඇතත් රෝහල්ගත වීමක් ගැන ඊයේ (24) සවස් වන තුරුම පොලීසිය දැනුවත් කර නොතිබුණි.
දෙදෙනා දෙදෙනාට එරෙහිව පහරදුන් බවට පැමිණිලි කර ඇති බැවින් මෙම පැමිණිලි දෙක සම්බන්ධයෙන්ම විශේෂ අවධානයක් යොමුකර විමර්ශන පැවැත්වෙන බව පොලීසිය කියයි
