දිනසේන රතුගමගේ –
පොලිස් ත්රස්ත මර්දන අංශය විසින් අත් අඩංගුවට ගෙන සිටි යාපනය නගරාධිපති විශ්වලිංගම් මනිවන්නන් ඊයේ (9 ) රාත්රී යාපනය මහාධිකරණයට ඉදිරිපත් කිරීමෙන් පසුව ඇප මත නිදහස් කොට තිබේ.
නගරාධිපතිවරයා පොලිස් ත්රස්ත මර්දන අංශය විසින් අත් අඩංගුවට ගෙන තිබුණේ යාපනය මහ නගර සභාව තුළ නීති විරෝධී ලෙස පොලිස් සේවයක් ආරම්භ කිරීම හා එම පොලීසියට කොටි සංවිධානයේ පොලීසිය පැවති කාලයේ තිබූ නිල ඇදුම්වලට සමාන නිල ඇදුමක් ලබා දීම යන චෝදනාවන් යටතේය.
නගරාධිපතිවරයා කොටි සංවිධානයට යළි පණ දීමටත් මහජනතාව තුළ කොටි සංවිධානය සම්බන්ධයෙන් යළි මතවාදයක් ගොඩ නැගීම සදහාත් මේ ක්රියාව සිදු කළ බවට පොලිස් ත්රස්ත මර්දන ඒකකය චෝදනා කොට තිබුණි. මේ සම්බන්දයෙන් ඔහුගෙන් පැය හයක කාලයක් පොලිස් ත්රස්ත මර්දන අංශය ප්රශන් කිරීමෙන් අනතුරුව ඔහුව 8 දා රාත්රී අත් අඩංගුවට ගෙන තිබුණි.
යාපනය මහධිකරණය වෙත නගරාධිපතිවරයා ඉදිරිපත් කිරීමෙන් පසුව ඔහු ඇප මත නිදහස් කොට ඇති අතර සිද්ධිය සම්බන්ධයෙන් නඩු විභාගයක් ජූනි මස 28 වෙනිදා පැවැත්වේ.
නගරාධිපතිවරයාට ඇප ලබා ගැනීම සදහා දෙමළ ජාතික සන්ධානයේ එම්.ඒ.සුමන්තිරන් මන්ත්රීවරයා ප්රධාන නීතිඥවරයෙකු වශයෙන් යාපනය මහධිකරණයට පැමිණ සිටි අතර තවත් නීතිඥවරු රැසක් හා යාපනයේ ප්රභූවරු රැසක් සහභාගි වී සිටියහ.
