අපරාධ කාරණා සම්බන්ධයෙන් නීතිපතිවරයාගේ තීරණ අමාත්ය මණ්ඩලය ඇතුළු දේශපාලන බලධාරීන් විසින් සමාලෝචනය නොකළ යුතු බව නීතිඥ සංගමය දැඩි ලෙස විශ්වාස කරන බව නීතිඥ සංගමය රජයට අවධාරණාත්මක ලිපියක් යවා තිබේ.
එවැනි දේශපාලන මැදිහත්වීම් නීතියේ ආධිපත්යය ආරක්ෂා කිරීම සඳහා අත්යවශ්යවන නීතිපති කාර්යාලයේ ස්වාධීනත්වයට හානිකරන බව ද නීතිඥ සංගමය පවසයි. නීතිපතිවරයාගේ බලතල ක්රියාත්මක කිරීමේදී අනවශ්ය ඇඟිලි ගැසීම් සිදුනොවන බව සහතික කරන ලෙස ද ජනාධිපතිවරයාගෙන් නීතිඥ සංගමය ඉල්ලා සිටී.
ජනාධිපති අනුර කුමාර දිසානායක අමතමින් නීතිඥ සංගමයේ සභාපති අනුර මැද්දෙගොඩ සහ ලේකම් චතුර ගල්හේනගේ අත්සන සහිතව මෙම ලිපිය යොමු කරනු ලබන්නේ ඊයේ (07) දිනයේදී ය.
ලසන්ත වික්රමතුංග ඝාතන නඩුවේ ප්රධාන සැකකරුවන් වන හමුදා බුද්ධි අංශයේ හිටපු සාමාජික සැරයන් ප්රේම් ආනන්ද උදලාගම, ගල්කිස්ස පොලිසියේ අපරාධ අංශයේ හිටපු ස්ථානාධිපති උප පොලිස් පරීක්ෂක තිස්ස සිරි සුගතපාල සහ විශ්රාමික ජ්යෙෂ්ඨ නියෝජ්ය පොලිස්පති ප්රසන්න නානායක්කාර පිළිබඳව මහේස්ත්රාත් පරීක්ෂණ නඩු අංක B/92/2009 හා සම්බන්ධව නඩු පැවරීමෙන් තොරව සැකකරුවන් නිදහස් කරන බවට නීතිපතිවරයා අපරාධ පරීක්ෂණ දෙපාර්තමේන්තුවට දැන්වීමත් සමග මතුවූ දැඩි සමාජ විරෝධය හමුවේ එම තීන්දුව සමාලෝචනය කරන බව කැබිනට් මාධ්ය ප්රකාශකවරයා කළ ප්රකාශය සම්බන්ධව සිය ස්ථාවරය ප්රකාශ කරමින් නීතඥ සංගමය මේ බව පැවසුවේය.
නීතිඥ සංගමය මගින් ජනාධිපතිවරයා වෙත යොමුකළ ලිපියේ මෙසේ ද දැක්වේ.
ලසන්ත වික්රමතුංග මහතාගේ ඝාතනයට අදාළව ගල්කිස්ස මහේස්ත්රාත් අධිකරණයේ අංක B 92/2009 දරන නඩුවේ සැකකරුවන් තිදෙනෙකු නිදහස් කිරීම සම්බන්ධයෙන් නීතිපතිවරයාගේ තීරණයක් සමාලෝචනය කිරීමට අමාත්ය මණ්ඩලය සලකා බලනු ඇති බවට ජනමාධ්ය වාර්තා පිළිබඳව නීතිඥ සංගමය දැඩි අවධානය යොමුකර තිබේ.
නීතිපතිවරයා මහජන ක්රියාකාරිකයකු වන අතර, එබැවින් ඔහුගේ තීරණ සම්බන්ධයෙන් මහජනතාවට වගකිව යුතු වුවද, අපරාධ කටයුතු සම්බන්ධයෙන් නීතිපතිවරයා අර්ධ අධිකරණමය කාර්යභාරයක් ඉටුකරන බව සැළකිල්ලට ගත යුතුය.
එබැවින්, විමර්ශන අධිකාරිය විසින් ඔහුට ඉදිරිපත් කර ඇති තොරතුරු මත පදනම්ව සැකකරුවකුට චෝදනා එල්ල කළ යුතුද ? නැද්ද ? යන්න තීරණය කිරීමට නීතිපතිවරයාට සිදුවේ. එසේ කිරීමෙන්, එවැනි කරුණු නීතියෙන් පිළිගත හැකිද යන්න සහ එවැනි කරුණු මත පදනම්ව, වරදකරුවකු වීමේ සාධාරණ අපේක්ෂාවක් තිබේද යන්න සලකාබැලීමට ඔහුට අවශ්ය වනු ඇත.
නීතිපතිවරයාගේ තීරණ සමාලෝචනයට ලක්කළ හැකි බව ශ්රේෂ්ඨාධිකරණය විසින් තීරණය කර ඇත. එවැනි සමාලෝචනයක් රිට් අධිකරණ බලය ක්රියාත්මක කිරීමෙන් හෝ මූලික අයිතිවාසිකම් අධිකරණ බලය ක්රියාත්මක කිරීමෙන් කළ හැකිය. එබැවින්, සැකකරුවකු නිදහස් කිරීමට හෝ නඩු පැවරීමට ගන්නා ඕනෑම තීරණයක් නීතියට අනුව ඉහළ අධිකරණය විසින් සමාලෝචනයට යටත් වෙයි.
අපරාධ කාරණා සම්බන්ධයෙන් නීතිපතිවරයාගේ තීරණ අමාත්ය මණ්ඩලය ඇතුළු දේශපාලන බලධාරීන් විසින් සමාලෝචනය නොකළ යුතු බව නීතිඥ සංගමය දැඩි ලෙස විශ්වාස කරයි. මන්ද එය නීතියේ ආධිපත්යය ආරක්ෂා කිරීම සඳහා අත්යවශ්ය වන නීතිපති කාර්යාලයේ ස්වාධීනත්වයට හානිකරන බැවිනි.
ඕනෑම රාජ්ය ක්රියාකාරිකයකු විසින් ගනු ලබන තීරණ පිළිබඳ මහජන විවාදය ප්රජාතන්ත්රවාදී සමාජයක අත්යවශ්ය අංගයක් වන අතර, මෙම ක්රියාකාරිකයින්ගේ ස්වාධීනත්වය ආරක්ෂා කිරීමේ අවශ්යතාවය ද ඒ හා සමානව වැදගත් වේ. අධිකරණ නිලධාරීන්ට සහ අර්ධ අධිකරණ නිලධාරීන්ට නීතියට අනුව තීරණ ගැනීමට සිදුවන බව තේරුම් ගත යුතු අතර, එය සමහර විට ජනප්රිය මතය පිළිබිඹු නොකළ හැකිය.
එබැවින්, නීතිපතිවරයාගේ බලතල ක්රියාත්මක කිරීමේදී අනවශ්ය ඇඟිලි ගැසීම් සිදුනොවන බව සහතික කරන ලෙස ඉල්ලා සිටින අතර, නීතිපති කාර්යාලය ඇතුළු ප්රධාන ආයතනවල ස්වාධීනත්වය ඔබතුමා විසින් දිගටම ආරක්ෂා කරනු ඇතැයි අපි විශ්වාස කරමු, එය අපේ රටේ නීතියේ ආධිපත්යය ආරක්ෂා කිරීම සඳහා අත්යවශ්ය වේ.
