-
රන් බුදු පිළිම 28ක් අස්ථානගත කිරීම, දළදා මාළිගාව සතු ප්රවේනි ඉඩම් ලෑන්ඩ් සේල් කරුවෙක් හරහා විකිණීම ඇතුළු චෝදනා රැසකට විමර්ශන ඉල්ලයි….
වසර විස්සකට ආසන්න කාලයක් ශ්රී දළදා මාළිගාවේ දියවඩන නිලමේ ධූරය අඛණ්ඩව දරන ප්රදීප් නිලංග විසින් සිදුකරන ලද දූෂණ ගණනාවකට එරෙහිව සමාජ ක්රියාකාරිකයෙක් විසින් අද (08) අපරාධ පරීක්ෂණ දෙපාරත්මේන්තුව වෙත පැමිණිල්ලක් ගොනු කර තිබේ.
දළදා මාළිගාව සතුව තිබූ රන් ප්රතිමා 28ක් අතුරුදහන් කිරීම, වත්මන් දියවඩන නිලමේවරයා සමබරගමු සමන් දේවාලයේ දියවඩන නිලමේ තනතුර දරද්දී රත්තරන් කිලෝ 38ක් අතුරුදහන් කිරීම, දළදා මාළිගාව සතු ප්රවේණි ඉඩම් දිවයිනේ ප්රමුඛ දේපළ වෙළෙඳාම් සමගාමක් හරහා වෙන්දේසි කර විකුණා දැමීම, , පින්නවල ඇත් අතුරු සෙවනේ ඇත් පැටවු දෙදෙනෙක් පැහැරගෙන යෑම, මහින්ද රාජපක්ෂ පාලන සමයේ දී රක්ෂිතයෙන් සොරකම් කළ ඇත් පැටවෙක් කකුල් හතරට විලංගු ලා කම්බේදොළ වලවේ ඉඩම තුළ ගාල් කර තිබෙද්දි පැමිණි ගංවතුරට යට කර එම සතා මැරෙන්නට හැරීම වැනි අපරාධ ගණනාවක් සම්බන්ධව විමර්ශන ඉල්ලා මෙම නඩුව ගොනු කළ බව සමාජ මාධ්ය ක්රියාකාරී ශෂික දිසානායක මාධ්යයට පැවසුවේය.
ඔහු පැවසුවේ දළදා මාළිගාවේ රත්තරන් සොරකම්කර සිය මිනි කූපර් රථය රනින් වාත්තු කළ පුද්ගලයෙක් ලෙස වත්මන් දියවඩන නිලමේවරයාට චෝදනා ඇති බවය.
“කපටි උපාසකයා නමින් පොතක් මුද්රණය කළා කැලණිය විශ්වවිද්යාලයේ ආචාර්යවරයෙක්. ඔහු දළදා මාළිගාව තුළ දියවඩන නිලමේවරයා විසින් කළ දූෂණ සහ වංචා ගණනාවක් සිය කෘතිය හරහා ලිඛිතව හෙළිදරවු කරලා තියනව. එහි තියන තොරතුරු අනුව වත්මන් දියවඩන නිලමේ ධූරය දරන නිලංග දෑල නැමති පුද්ගලයා දළදා වහන්සේත් ජපානයට අලෙවි කර ඇති බවට චෝදනාවක් එල්ල වෙලා තියනවා. අද අපරාධ පරීක්ෂණ දෙපාර්තමේන්තුවට ආවේ මේ සම්බන්ධව විමර්ශනයක් ඉල්ලා පැමිණිල්ලක් කරන්න….”
සමාජ මාධ්ය ක්රියාකාරී ශෂික දිසානායක මාධ්ය ඉදිරියේ ප්රකාශ කළේය. මේ වසර අවසන්වන විට පැවැත්වීමට නියමිත දියවඩන නිළමේවරයා තෝරා ගැනීමේ ඡන්දයත් සමග මේ දූෂණ වංචා සහිත සැඟවුන යථාර්ථයක් දළදා මාළිගාව ආශ්රිතව හෙළිකිරීමට කරන උත්සාහය විශේෂ අවස්ථාවක් සේ දැකිය හැකිය.
