අද (14) අරලියගහ මන්දිරය ජනාධිපති මන්දිරය, ජනාධිපති ලේකම් කාර්යාලය සහ අග්රාමාත්ය ලේකම් කාර්යාලය ඇතුළු අරගලකරුවන් අත්පත් කරගෙන සිටි ගොඩනැගිලි සියල්ල ආරක්ෂක අංශ වෙත හෝ රතුකුරුස සංවිධානය වෙත භාර දෙන බව විරෝධතාකරුවෝ ප්රකාශ කරති.
මෙම දේපලවලට තමන් කිසිම හානියක් නොකළ බවත්, මේ වටිනා දේපල ජනතාව අතට පත්වීම නිසාත්, වැඩිපුර ජනපිරිසක් එහි ගැවසීම නිසාත් ඊට හානි වනු ඇතැයි ගොඩනැගෙන සමාජ මතයට ඇහුමකන් දී, නීතිඥ සංගමය කළ ඉල්ලීමට අවනත වෙමින් මෙම දේපල යළි භාර දීමට කටයුතු කරන බව අරගලකරුවෝ අද මාධ්ය වෙත ප්රකාශයක් නිකුත් කළහ.
එහෙත් මේ ගොඩනැගිලි යළි භාර දෙන්නේ හොර අගමැතිවරයෙකුට හෝ ජනාධිපතිවරයෙකුට එහි ලගින්නට නොවන බව ද අරගලකරුවෝ කීහ.
අරලියගහ මන්දිරයේ සිටි අරගලකරුවන් පිරිස මාධ්ය හමුවේ කීවේ මෙවැන්නකි.
“අත්පත් කරගත් අවස්ථාවේ සිට අපි අරලියගහ මන්දිරයේ කිසිම දේපලකට හානි කළේ නෑ. මේක වටිනා දේපලක්. එය ජනතාව අත්පත් කරගැනීම සහ වැඩිපිරිසක් පැමිණීම නිසා ජනතාවගෙන් මේ දේපලට හානියක් වේවි කියලා සමාජ මතයක් ඇතිවෙලා තියනවා. ඒ නිසා නිර්පාක්ෂික අරගලකරුවන් ලෙස අද සවස් වරුවේ බොහෝ දුරට අරලියගහ මන්දිරය භාරදීම සම්බන්ධව තීරණයක් ගන්නවා“
“නීතිඥ සංගමය මේ සම්බන්ධව ඉල්ලීමක් කරලා තියනවා. අප ඔවුන්ට ඇහුම්කන් දිය යුතුයි. නීතිඥ සංගමයත් සමග සාකච්ඡා කර මෙය නැවත ආරක්ෂ අංශ වෙත හෝ රතුකුරුස සංවිධානයට භාර දීමට තමයි අප කල්පනා කරන්නේ.“
“ඒත් මේක භාර කරන්නෙ කිසිම හොර අගමැතිකෙනෙකුටවත් හොර ජනාධිපතිවරයෙකුටවත් ලගින්න නෙමෙයි. අපේ ඉල්ලීම තාම එලෙසමයි. ජනාධිපතිවරයා වහාම ඉල්ලා අස්විය යුතුයි. අගමැතිවරයා වහා ඉල්ලා අස්විය යුතුයි. සර්වපාක්ෂික ආණ්ඩුවක් පත්විය යුතුයි. පාර්ලිමේන්තුව තුළ කුට්ටම් සෙල්ලම් කරලා නැවත රටේ බලාපොරොත්තු සුන් නොකර පිරිසිදු දේශපාලඥයින්ගෙන් යුතු කණ්ඩායමකින් මාස 06ක් රට ඉදිරියට ගෙනිහින් මේ රට යථා තත්වයට පත් කර මැතිවරණයකින් නව රජයක් පිහිටුවිය යුතුයි කියන එකයි අරගලකරුවන්ගේ ඉල්ලීම. “
