විශ්රාමික ජනාධිපතිවරුන්ගේ වරප්රසාද කප්පාදු කිරීමේ පනත් කෙටුම්පත සැප්තැම්බර් දහවෙනිදා සම්මත වූ පසු හිටපු ජනාධිපති මහින්ද රාජපක්ෂ කොළඹ 07, විජේරාම පෙදෙසේ පිහිටි තම නිල නිවසින් වහාම පිටව ගිය ද එම නිල නිවස තවමත් රජයට භාරදීමට හැකියාවක් ලැබී නැත්තේ හිටපු ජනාධිපතිවරයාට තමන්ගේ පෞද්ගලික භාණ්ඩත් රජයෙන් ලැබුණු භාණ්ඩත් වෙන් කර හඳුනා ගැනීමට නොහැකි වීම නිසා බව වාර්තා වේ.
මහින්ද රාජපක්ෂ නිල නිවසෙන් ඉවත් වන විට ඔහුගේ මාධ්ය ප්රකාශක නීතීඥ මනෝජ් ගමගේ ප්රකාශ කළේ විජයරාම නිල නිවස සතියකින් රජයට භාර දෙන බවය. මේ වන විට සති තුනක් ඉකුත්වී තිබුනත් තවමත් එම නිවස රජයට භාරදී නැත.
ආරංචි මාර්ග සඳහන් කරන පරිදි පහුගිය දෙවැනිදා විජයරාම නිවස භාරගැනීමට පැමිණෙන ලෙසට මනෝජ් ගමගේ නීතිඥවරයා කළ දැනුම් දීමට අනුව ජනාධිපති ලේකම් කාර්යාලයෙන් හා රාජ්ය පරිපාලන අමාත්යාංශයෙන් නිලධාරීන් පිරිසක් එම නිවසට ගොස් තිබේ.
එහිදී මනෝජ් ගමගේ රජයේ නිලධාරීන්ට පවසා ඇත්තේ ජනාධිපති නිල නිවසෙන් හා අගමැති නිල නිවසෙන් යන නිවාස දෙකෙන්ම ගෙනා බඩු මෙහි ඇති බැවින් ඒවා රැගෙන ගොස් මහින්ද රාජපක්ෂ හිටපු ජනාධපතිවරයාට අයත් පෞද්ගලික භාණ්ඩ එහි තබා යන ලෙසය. නමුත් ඊට අදාළ කිසිදු ලේඛනයක් ඔහු සතුව තිබී නැත.
රාජ්යයට අයත් හෝ පෞද්ගලික හිමිකමට භාණ්ඩ බාරගන්න ආකාරයෙන්ම ආපසු භාර දීමේදී ද කළ යුත්තේ ලබාදෙන භාණ්ඩ පිළිබඳ ලේඛණ සහිතවය. භාණ්ඩ භාරගත් මහින්ද රාජපක්ෂ හිටපු ජනාධිපතිවරයා විසින් එම ලේඛනය සකසා භාරදිය යුතුය. ක්රමවේදය එයය.
එහෙත් එවැනි ලේඛනයක් රහිතව මහින්ද රාජපක්ෂ රජයෙ නිල නිවාස දෙකක භාණ්ඩද විජයරාම නිවසට රැගෙන විත් තිබේ. භාණ්ඩ පැටලිල්ලේ ගැටලුව උග්ර කිරිමට එයද හේතු වී තිබේ. දැන් ඔහුට මේ භාණ්ඩ ගොඩ අතරේ තමන්ගේ පෞද්ගලික භාණ්ඩ මොනවාදැයි හඳුනා ගත නොහැකි අර්බුදයක් මතුවී තිබේ.
ගැටලුව තවත් උග්ර වී ඇත්තේ නිශ්චිත ලේඛනයක් ඉදිරිපත් නොකර ඒ නිසා රජයට අයත් භාණ්ඩ හඳුනා ගෙන ඒවා රැගෙන යන්නැයි රජයේ නිලධාරීන්ට දන්වමින් විජයරාම නිවස නිසි පරිදි භාර දීම කල් මැරීම බව රජයේ ආරංචි මාර්ග පවසයි.
