අසේල කුරුළුවංශ
නාය යෑමේ අවධානමක් හේතුවෙන් නිවැසියන් පිටව යෑම නිසා වසා දමා තිබුණු නිවසක් ගිනි ගැනීමට ලක්ව තිබෙන බවට අංකුඹුර පොලීසියට අද (23) ලද පැමිණිල්ලකට අනුව සිදුකළ පරීක්ෂාවකදී එම නිවස තුළ තිබී පිළිස්සී මියගිය පුද්ගලයෙකුගේ සිරුරක් හමුවී ඇත.
අංකුඹුර ගල්කන්ද ප්රදේශයේ වසා දමා තිබුණු නිවස තුළ ගින්නක් හටගෙන තිබෙන බවට ප්රදේශවාසියෙකු වන නිහාල් ප්රේමචන්ද්ර නැමැති අය අද (23) පෙරවරු 11.00 ට පමණ පොලීසියට පැමිණිල්ලක් සිදුකර තිබේ.
ඒ අනුව පොලිස් කණ්ඩායමක් එහි ගොස් සිදුකළ පරීක්ෂාවේදී හඳුනාගත නොහැකි ආකාරයෙන් බරපතළ ලෙස පිළිස්සී ගිය මළ සිරුර හමුවී ඇත.
පසුගිය දිනවල පැවැති අධික වැසි තත්ත්වයත් සමඟ ඇතිවූ නාය යෑමේ අවදානමක් හේතුවෙන් මෙම නිවසේ හිමිකරු වන ඩබ්ලිව්.සී සෙනවිරත්න යන අය පවුලේ අය සමඟ නිවසින් පිටව මීගමුවේ පදිංචි ඔහුගේ දියණියටගේ නිවසට ගොස් තිබෙන බව පොලිස් පරීක්ෂණ මගින් අනාවරණය වී තිබේ.
ගින්නෙන් නිවසටද දැඩි අලාභහානි සිදුව ඇති අතර මෙය ඝාතනයක්ද නැතහොත් සියදිවි නසා ගැනීමක් ද යන්න මෙතෙක් අනාවරණය වී නොමැත.
සිද්ධිය සම්බන්ධයෙන් ප්රදේශවාසීන් කිහිප දෙනෙකුගෙන්ම පොලීසිය ප්රකාශ ලබාගෙන තිබේ. අංකුඹුර පොලීසිය සිද්ධිය සම්බන්ධයෙන් වැඩිදුර පරික්ෂණ පවත්වයි.
