-
ගල් අඟුරු වංචාව පියවන්න හදන බවට වෘත්තීය සමිතිවලින් චෝදනා…
-
පියවන්න වංචාවක් සිදුවිය යුතුයි… කිසිම වංචාවක් නෑ… විදුලි ගාස්තු වැඩි කරන්න ඉල්ලා සිටින්නේ නිශ්පාදන පිරිවැයට සරිලන ගැලපුමකට මිස ලාභ පාඩු පියවන්න නෙමෙයි… රජය උත්තර දෙයි!
2026 වසරේ දෙවන කාර්තුව සඳහා විදුලි ගාස්තු සියයට 13.56කින් ඉහළ නැංවීමට ලංකා විදුලිබල මණ්ඩලය ඉදිරිපත් කළ යෝජනාවට විවිධ පාර්ශ්වයන්ගෙන් දැඩි විරෝධයක් එල්ල වෙමින් පවතී. විශේෂයෙන්ම වෘත්තීය සමිති නියෝජිතයන් පෙන්වා දෙන්නේ මීට පෙර සිදුවූ බව කියන “ගල් අඟුරු වංචාවේ” පාඩුව පියවා ගැනීමට රජය මෙලෙස ජනතාව මත බදු බර පටවන බවයි.
වාර්ෂිකව සිව් වතාවක් සිදුකරන විදුලි ගාස්තු සංශෝධන ක්රියාවලියට අනුව, 2026 අප්රේල් 01 වැනිදා සිට ජුනි 30 වැනිදා දක්වා කාලසීමාව සඳහා මෙම නව ගාස්තු ඉහළ නැංවීම යෝජනා කර ඇත. මේ සම්බන්ධ යෝජනාවලිය ලංකා විදුලිබල මණ්ඩලය විසින් පසුගියදා ශ්රී ලංකා මහජන උපයෝගිතා කොමිෂන් සභාව වෙත ඉදිරිපත් කරන ලදී.
මීට පෙර 2026 පළමු කාර්තුව සඳහා ද විදුලිබල මණ්ඩලය විසින් සියයට 11.57ක ගාස්තු වැඩිවීමක් ඉල්ලා සිටියද, නිසි කලට විධිමත් යෝජනාවක් ඉදිරිපත් නොකිරීම හේතුවෙන් මහජන උපයෝගිතා කොමිසම එය ප්රතික්ෂේප කර තිබුණි. ඒ අනුව පෙබරවාරි 13 වැනිදාට පෙර නව යෝජනාවලිය ඉදිරිපත් කරන ලෙස කොමිසම කළ දැනුම්දීමට අනුව මෙම නව ඉල්ලීම සිදුකර ඇත.
මහජන උපයෝගිතා කොමිෂන් සභාව ප්රකාශ කර ඇත්තේ, විදුලිබල මණ්ඩලය ඉදිරිපත් කළ මෙම සියයට 13.56ක ගාස්තු වැඩි කිරීමේ යෝජනාව මේ වන විට සමාලෝචනය කරමින් පවතින බවයි. එම ක්රියාවලියෙන් අනතුරුව ඒ පිළිබඳව මහජන අදහස් විමසීමට පියවර ගන්නා බවත්, අවසන් තීරණය දැනුම් දෙන්නේ ඉන් පසුව බවත් කොමිසම අවධාරණය කරයි.
මෙම ගාස්තු සංශෝධනය සම්බන්ධයෙන් අදහස් දක්වන වෘත්තීය සමිති නායකයින් පවසන්නේ, පාලනාධිකාරියේ අකාර්යක්ෂමතාවය සහ දූෂිත ගනුදෙනු හේතුවෙන් සිදුවූ පාඩු මහජනතාවගෙන් අයකර ගැනීම අසාධාරණ බවයි. විශේෂයෙන්ම ගල් අඟුරු මිලදී ගැනීමේදී සිදුවූ බව කියන මූල්ය අක්රමිකතාවල බලපෑම විදුලි බිලට එකතු කිරීම ඔවුන්ගේ දැඩි විවේචනයට ලක්ව ඇත.
වෘත්තීය සමිති එල්ල කරන චෝදනා ප්රතික්ෂේප කරන රජයේ බලධාරීන් සහ විදුලිබල අමාත්යාංශ ආරංචි මාර්ග පෙන්වා දෙන්නේ ගල් අඟුරු මිලදී ගැනීමේ ක්රියාවලිය විනිවිදභාවයකින් යුත් ජාත්යන්තර ටෙන්ඩර් පටිපාටියක් යටතේ සිදුවූවක් බැවින් එහි කිසිදු මූල්ය වංචාවක් සිදුව නොමැති බවය.
එබැවින් පාරිභෝගිකයන්ගෙන් එහි පාඩුවක් සිදුව නැති බව එම ආරංචි මාර්ග තහවුරු කරයි. විදුලි ගාස්තු තීරණය වන්නේ උත්පාදන පිරිවැය, ඉන්ධන මිල සහ විනිමය අනුපාතික වැනි වත්මන් වෙළඳපොළ සාධක මත පදනම්ව මිස අලාභයන් පියවා ගැනීමට නොවන බව රජය අවධාරණය කරයි. ඒ අනුව, මෙම ගාස්තු සංශෝධනය තනිකරම ඉදිරි කාලසීමාව තුළ විදුලිය සැපයීම සඳහා වැයවන සැබෑ නිෂ්පාදන පිරිවැය (Cost-Reflective Tariff) පියවා ගැනීම සඳහා ඉදිරිපත් වූ තාක්ෂණික යෝජනාවක් මිස වංචා හෝ දූෂණවල ප්රතිඵලයක් නොවන බව රජය වැඩිදුරටත් පෙන්වා දෙයි.
