ඉදුනිල් කහටපිටිය –
දිවයින පුරා සෑම නගරයකම ඊයේ 5 අද 6 හෙට 7 සහ අනිද්දා 8 යාචක සංගණනයක් සිදු කිරීමට මධ්යම රජයේ සමාජ සේවා දෙපාර්තමේන්තුව කටයුතු යොදා තිබේ.
මෙතෙක් යාචකයින් පිළිබඳ වගකීම පළාත් සභා සමාජ සේවා දෙපාර්තමේන්තුවට අයත් ව තිබූ අතර අයාල ආඥා පනත බලාත්ම කිරීමේ බලය මධ්යම රජයේ සමාජ සේවා දෙපාර්තමේන්තුවට පැවරීම හරහා යාචකයන්ගේ ගැටලු විසඳීමට ඍජු මැදිහත් වීමක් සිදු කිරීමට සමාජසේවා දෙපාර්තමේන්තුව අපේක්ෂා කරයි.
සමාජ සේවා දෙපාර්තමේන්තුව ප්රථම වතාවට යාචක සංගණනයක් සිදුකරන බවත් ඒ හරහා ඔවුන්ට ප්රශ්නාවලියක් ඉදිරිපත් කරමින් ඊට සරිලන පරිදි සහන සැලසීමට අපේක්ෂා කරන බවත් ගඟවටකෝරලේ ප්රාදේශීය ලේකම් කාර්යාලයේ සමාජ සේවා නිලධාරි ශිරෝමි ආර්යවර්ධන ප්රකාශ කළාය.
ශ්රී ලංකාවේ සෑම නගරයකම යාචක ජනගහනය ඉහල යාම මත සෞඛ්ය සහ සමාජ ප්රශ්න උග්ර වීමේ අවධානමක් ඇති බැවින් එය අවම කිරීමේ අරමුණින් මෙම සංගණනය දිවයින පුරා ක්රියාත්මක කිරීමට සමාජසේවා දෙපාර්තමේන්තුව කටයුතු කළ බවද ඇය කීවාය.
මේ ඔස්සේ ඉදිරිපත් කරන ප්රශ්නාවලිය මත යාචකයින් වර්ගීකරණයක් ද සිදුවෙයි. දිගුකාලීනව නගරබදව සැරිසරන යාචකයින් එය වෘත්තියක් කොට ගෙන ඇති බැවින් ඔවුන්ගේ ආදායම් මාර්ග පිළිබඳ ඍජුව සාකච්ඡා කිරීමටත් මහ මගින් හෝ නගරයෙන් ඉවත් වීමට නම් ඔවුනට අවශ්ය වන්නේ කුමක්ද යන්න විමසා බැලීමටත් සමාජ සේවා දෙපාර්තමේන්තු නිලධාරීහු කටයුතු කරති.
එම වර්ගීකරණය මත රිදීගම යාචක පුනරුත්ථාපන මධ්යස්ථානය වෙත යොමු කිරීමට සුදුසු යාචකයින් ඒ සඳහා යොමු කිරීමටත්, සමාජ සේවා දෙපාර්තමේන්තුව මගින් සපුරාලිය හැකි පහසුකම් මත ඒ ඒ අවශ්යතා සහිත යාචකයන්ට පහසුකම් ලබා දෙමින් නගරයෙන් හෝ මහ මාර්ගයෙන් ඉවත් කිරීමට කටයුතු කරන බවත් ඇය කියා සිටියාය
