දළදා වන්දනා සිදුකළ දින 10 තුළ සිදුවුන සෑම සිද්ධියක් සම්බන්ධවම ගැඹුරින් අධ්යයනය කර ඒකාබද්ධ සත්ය වාර්තාවක් සකස් කරන බවත් මෙම වාර්තාව සකස් කිරීමේ අරමුණ ඕනෑම අවස්ථාවක රටේ සිදුවන විශාල ජනරාශී වීමක් කළමනාකරණය කරගැනීමට අවශ්ය අත්දැකීම් සහිත දැනුම ලබා ගැනීම සඳහාත් බව මධ්යම පළාත් ආන්ඩුුකාර ආචාර්ය එස්.බී අබේකෝන් පැවසීය.
අද පැවති විශේෂ මාධ්ය හමුවකදී ඔහු ප්රකාශ කළේ පළාත් ආණ්ඩුකාර කාර්යාලයේ විශේෂ මෙහෙයුම් කමිටුවක් මගින් මෙම අවස්ථාවට සේවා සැපයූ සියලුම රාජ්ය ආයතනවලින් සත්ය වාර්තා ගෙන්වාගෙන හැකියාවන් සහ නොහැකියාවන් සම්බන්ධව පැහැදිලි අදහසක් ලබා ගත හැකි සේ අවසන් වාර්තාවක් හැකි ඉක්මනින් සකස් කර එම සත්ය වාර්තාව ජනාධිපතිවරයා වෙත ලබා දීමට කටයුතු කරන බවය.
දළදා වන්දනාව සඳහා සහයෝගය දැක්වූ සියලුම පාර්ශවයන්ට ස්තුතිය පළ කිරීම ප්රධාන පරමාර්ථ කරගෙන පැවති මෙම මාධ්ය හමුවේ දී අතිපූජ්ය මල්වතු අස්ගිරි මහානායක හිමිවරු ඇතුළ සමස්ථ ශාසන භාරකාරිත්වයටත් දියවඩන නිලමේවරයා ඇතුළු හතර දේවාලයේ නිලමේ වරුන් සහ සමස්ථ නිලමේ වරුන් වෙතත් මුලින්ම ආණ්ඩුකාරවරයා ස්තුති කළේය.
ජනාධිපති අගමැති ඇතුළු අමාත්ය මණ්ඩලයත්, ජනාධිපති ලේකම් ඇතුළු මධ්යම රජයේ සහ පළාත් සභා ලේකම්වරු සහිත පරිපාලනයටත්, ආරක්ෂක අමාත්යාංශයේ ලේකම්වරයා ත්රිවිධ හමුදාව පොලිසිය ඇතුළු සියලු ආරක්ෂක අංශ වෙතත් ආණ්ඩුකාරවරයාගේ ස්තුතිය පල විය.
අනතුරුව මේ දළදා වන්දනා කාලය තුළම ආගමික සහජීවනයේ ගෞරවනීය ගැඹුර ලෝකයට පෙන්වමින් පැය 24 පුරාම බැතිමතුන්ට සේවා සැපයූ මහනුවර ඉස්ලාම් හින්දු කතෝලික ආගමික නායකයින්ට ආණ්ඩුකාරවරයාගේ ස්තුතිය පිරිනැමිනි.
” ක්ලීන් ශ්රී ලංකා ව්යාපෘතිය, දිසාපති ඇතුළු සමස්ථ නිලධාරීන්, පළාත් සෞඛ්ය ඇතුළු රෝහල් සෞඛ්ය කාර්ය මණ්ඩල මධ්යම පළාත් ප්රවාහන මහාමාර්ග හා නාගරික සංවර්ධන අංශ , පලාත් කොමසාරිස්, නාගරික කොමසාරිස්, ජන මාධ්ය, වෙළෙඳප්රජාව සහ විශේෂයෙන්ම මහනුවර ජනතාවට ස්තුතිය පුද කරනවා මේ කාර්යය සාර්ථක කරගන්න උදවු කළාට.”
“දිනපතා මෙහෙයුම් කමටුව රැස් වෙලා දෛනික තත්ත්වය සාකච්ඡා කරමින් පසුදින කටයුතු සැලසුම් කරන්න වෙහෙසක් ගත්තා. ඒ අනුව යම් තරමින් හෝ අවසන් දිනවල පැමිණෙන ජනතාව පාලනය කරගන්න හැකියාව ලැබුණා. ඒ නිසා මේ තරමින් වත් ගැටලුවක් ඇති නොවී කටයුතු කරගෙන ගියා.” ආණ්ඩුකාරවරයා පැවසුවේය.
