මනම්පිටිය නිමල් ජයරත්න –
නැගෙනහිර පළාතේ මඩකලපුව තොප්පිගල රක්ෂිතය ඇතුළු වඩමුනේ, උත්තුචේන රක්ෂිත රැසක් හා පුරාවස්තු මෙන්ම වන සංරක්ෂණ දෙපාර්තමේන්තුවට අයත් භූමි කිසියම් පිරිසක් විසින් ඩෝසර් දමා මේ වන විට විනාශ කරමින් පවතින බව ප්රදේශයේ පරිසරවේදීන් මෙන්ම ගම්වාසීන්, ගොවි නියෝජිතයෝ සඳහන් කරති.
තිස් දෙනෙකුගෙන් පමණ යුත් දෙනෙකුගෙන් කණ්ඩායමක් මේ වන විට අක්කර 1500 ට ආසන්න රක්ෂිත ප්රමාණයක සම්පූර්ණයෙන් වනසා තිබෙන බවත්, ඔවුන් එහි වී වගාව සිදු කිරීමට යැයි පවසා දිවා රාත්රීි ඩෝසර් කරමින් පවතින අතර එම රක්ෂිතවල සිටින වන සතුන්, මෙන්ම වන අලි ගම්වැදීමට පටන්ගෙන ඇති බවද උත්තුචේන ගම්වැසියෝ සඳහන් කරති.
එම රක්ෂිත තුළ පැල්පත් ඉදිකරමින් මෙම සංවිධානාත්මක ජාවාරම්කරුවන් ගිනි අවි නිෂ්පාදනය කරගනිමින් එම වනාන්තරවල සිටින මොනරුන්, මුවන්, හාවන්, මීමින්නන්, මෙන්ම වන සතුන් දඩයම් කරමින් මස් ජාවාරමක නිරත වන බවද ගම්මු කියති.
මේ වන විට තොප්පිගල රක්ෂිතයේ වඩමුනේ ප්රදේශයට වන්නට අක්කර ගණනාවක් මෙම ජාවාරම්කරුවන් විසින් ඩෝසර්කර ඇති අතර උත්තුචේන, වඩමුනේ ඇතුළු රක්ෂිත වනසා තිබෙන බවත්, එහි තිබෙන වටිනා පුරාවස්තු රැසක් විනාශ කර තිබෙන බවද උත්තේජන ගම්වැසියෝ පෙන්වා දෙති.
මේ පිළිබඳව වන සංරක්ෂණ දෙපාර්තමේන්තුවට, ප්රාදේශීය ලේකම් කාර්යාලයට මෙන්ම අදාළ බලධාරීන්ට ලිඛිත හා වාචිකවත්, දුරකථන ඇමතුම් මේ පිළිබඳ දැනුම්වත් කළද ඊට මෙතෙක්, කිසිදු බලධාරියකු ක්රියාමාර්ගයක් නොගෙන ඇති බවත්, බලහත්කාරයෙන් රජයේ ඉඩම් සහ රක්ෂිත වන වනාන්තර අල්ලා සිදුකරන මෙම ජාවාරම නිසා සතුන්ගේ ජීවිත මෙන්ම තමන්ගේ ජීවිත දැඩි අනතුරට ලක්ව ඇති බවද ඒ අවට ගම්වාසිහු පවසති.
එම රක්ෂිතවල තිබෙන වටිනා පළු, වීර, බුරුත, ඇතුළු ශාක වර්ග ඩෝසර් මඟින් දිවා රාත්රියේ බිම් හෙළන බවත්, මෙම ජාවාරම්කරුවන්ට පොලොන්නරුව සහ මඩකලපුව දිස්ත්රික්ක නියෝජනය කරන සමහරක් දේශපාලඥයන්ගේ රැකවරණය ලැබී තිබෙන බවත්, ඔවුන්ගේ අනුගාමිකයන් මෙන්ම ආධාරකරුවන් මෙම අපරාධයන් පිටුපස සිටින බවට තොරතුරු දැනගන්නට ලැබී ඇති බවද ප්රදේශයේ පරිසරවේදී හා ගොවි සංවිධානය සඳහන් කරති.
අප මේ පිළිබඳව මහවැලි බී කලාපය නේවාසික ව්යාපාර කළමනාකාර සුගත් වීරසිංහගෙන් දුරකථනයෙන් කළ විමසීමකදී ඔහු සඳහන් කළේ මෙම ඉඩම්බල ප්රදේශ මහවැලියෙන් පාලනය නොවන බවත්, එය වැලිකන්ද සහ කිරාන් ප්රාදේශීය ලේකම් කාර්යාලවලින් පාලන ප්රදේශ බවයි. කෙසේ වෙතත් මේ පිළිබඳව සොයා බැලීමට මහවැලි ආරක්ෂක අංශයේ නිලධාරීන් පිරිසක් ඉතා කඩිනමින් යොමු කරන බවද සුගත් වීරසිංහ මහතා කීවේය.
මෙම රක්ෂිත, පුරා වස්තු ස්ථාන මෙන්ම වනාන්තර විනාශ කිරීම අප වැලිකන්ද ප්රාදේශීය ලේකම් හයිරූන් නිශා මහත්මියගෙන් දුරකථනයෙන් කල විමසීමකදී ඇය පැවසුවේ, ඩෝසර් දමා විනාශ කරන රක්ෂිත ප්රදේශ තම බලප්රදේශයට අයත් නොවන බවයි.
අනතුරුව අප මේ පිළිබද කිරාන් ප්රාදේශීය ලේකම් කාර්යාලයෙන් දුරකථනයෙන් කළ විමසීමකදී එහි නිලධාරියෙකු සඳහන් කළේ මේ පිළිබඳ පරීක්ෂණයක් සිදුකර උත්තරයක් ලබාදෙන බවයි.
