මෙපමණ කාලෙකට කිසිදු බාහිර පුද්ගලයකුටවත් ඇතුළු වෙන්නට නොහැකි ව තිබූ පොලොන්නරුවේ මහා පරිමාණ මෝල් පරීක්ෂාව කිරීමට මේ රජයේ නිලධාරීන්ට හැකියාව ලැබීම සම්බන්ධයෙන් තමන් අවංකවම සතුටු වන නමුත් ඩඩ්ලිලාට නිපුනලාට කැ කෝ ගසා බලෙන් සහල් මිල පාලනය කළ නොහැකි බව හිටපු අමාත්ය ආචාර්ය හර් ද සිල්වා පවසයි. සහල් මිල පාලනය සඳහා කල යුත්තේ විධිමත් ලෙස රජය මැදිහත් වී තරගකාරීත්වයක් නිර්මාණය කිරීම බවත් හිටපු අමාත්යවරයා ප්රකාශ කරයි. තමන් ආර්ථික ප්රතිපත්ති කටයුතු අමාත්යවරයා ලෙස සිටිය දී රජය මැදිහත් වී මෙවැනි තරගකාරීත්වයක් ඇති කිරීමට ශක්ති සම්බා සහල් අලෙවි වැඩ සටහන දියත් කළ බවත් එයින් සහල් වෙලඳපොලේ මිල පාලනයක් කිරීමට හැකි වූ බවත් ආචාර්ය හර්ෂ පෙන්වා දුන්නේ අද සිරස නාලිකාවේ පැතිකඩ වැඩසටහනට සහභාගී වෙමිනි.
මෙහිදී තම අමාත්යංශයේ මූලිකත්වයෙන් සහල් නිෂ්පාදකයන්ගේ සමූපකාර සමිතියක් බිහි කළ බවත් ඔවුන්ගේ නිෂ්පාදන ශක්ති සම්බා නමින් හඳුන්වා දුන් අතර එයින් සහල් කිලෝ ග්රෑමයක මිල රුපියල් 10ත් 15ත් අතර මිලකින් අඩු කරගෙන පවත්වාගෙන යාමට හැකි වූ බවත් පෙන්වා දුන්නේය.
“සහල් මිල පාලනය කිරීමට රජයේ මැදිහතත්වීමක් අවශ්යයි. ආමි එකක් අවශයයි. ආමි කියන්නේ තුවක්කු අරන් යන එකක් නෙවෙයි. නමුත් තරගකාරීත්වය ඇති කිරීමේ ශක්තිමත් ක්රමයකට අප යා යුතුයි. අපි මහජන මුදල් වැය කරල කුඩා මෝල් හිමියන්ට කාරක ප්රාග්ධනය ලබා දුන්නා. ඒක මුදල් දන් දීමක් නෙවෙයි. අපි මේ සඳහා රුපියල් බිලියනයක් වෙන්කළා. මේ සහල් නිෂ්පාදනය වෙනුවෙන් වැය කළේ මිලියන 600ක් විතරයි. අපි මේ මොල් හිමියන්ට සතයක්වත් දුන්නේ නැහැ.. මුදල් දුන්නේ ඔවුන්ට වී දුන්නු ගොවීන්ට. එය ප්රාදේශිය ලේකම් හරහා පැය 24ක් තුළ සිදුවුණා. සාමාන්යයෙන් පෞද්ගලික මෝල හිමියන් කරන්නේ ගොවියා ලඟටම ගිහින් වී ගන්න එක. වී අලෙවි මණ්ඩලය කරන්නේ තමන්ගේ ගබඩා ටික ඇරගෙන ඉඳලා ගේන අයගෙන් වී ටික ගන්නවා. නමුත් එතන තරගකාරීත්වයක් නෑ. නමුත් අපේ සමූපකාර ක්රමය තුළ පෞද්ගලික මෝල් හිමියන් සමඟ තරගකාරීත්වයක් නිර්මාණය වුණා.
පසුගිය කන්නයේ වී අලෙවි මණ්ඩලය විසින් මිල දී ගනු ලැබ ඇත්තේ මෙට්රික් ටොන් 25000ක් පමණයි. මේ තත්ත්වය තුළ ආන්ඩුවට සහල් මිල පාලනය කිරීමට තරගයක් දෙන්න බෑ. තරගයක් දෙන්න නම් වෙලෙඳපොල තුළ තරගයක් දිය යුතුයි. ඒ සඳහා ශක්ති සහල් වැඩපිළිවෙළ හොඳ ක්රමයක් . ආණ්ඩුවට අපි දැම්ම නම දාන්න බැරි නම් වෙන නමකින් හෝ මේ ආකාරයට සහල් මිල පාලනය කිරීමේ ප්රායෝගික වැඩ පිළිවෙළ යළි ආරම්භ කළොත් ඉතා වැදගත්.
