මනම්පිටිය නිමල් ජයරත්න –
පුත්තලම සහ කඳාන යන ප්රදේශවලින් දිඹුලාගල කුඩාවැව ගම්මානයට පැමිණ ලැගුම් හලක රැඳී සිටිමින් අයිස් මත්ද්රව්ය ජාවාරමේ යෙදී සිටි බවට සැක පිට යුවළක් ඊයේ ( 05 ) රාත්රියේදී අත්අඩංගුවට ගත් බව මනම්පිටිය පොලිසිය කියයි.
සැකකාර යුවළ පැමිණි වැගන්ආර් කළු පැහැති මෝටර් රථයද අත්අඩංගුවට ගෙන ඇති අතර සැකකාර පිරිමි පුද්ගලයා සතුව හෙරොයින් මිලි ග්රෑම් 2016 සහ කාන්තාව සතුව හෙරොයින් මිල ග්රෑම් 2007 ක් තිබී සොයාගැනීමට හැකි වූ බව ඒ පිළිබඳ පරීක්ෂණ සිදුකරන මනම්පිටිය පොලිසිය පවසයි.
සැකකාර කාන්තාව ජාඇල කඳාන ප්රදේශයේ පදිංචි වයස අවුරුදු 31 වියෙහි පසුවන්නියකි. පිරිමි පුද්ගලයා පුත්තලම ප්රදේශයේ පදිංචි අවුරුදු තිස් හතරක් වයසති අයෙකු බවද පොලිසිය කියයි.
මොවුන් දිඹුලාගල ප්රදේශයට පැමිණ දින පහකට වැඩි කාලයක් ගත කර ඇති අතර සැකකාර කාන්තාවගේ කුඩාවැව ගම්මානයේ මිතුරියක් සමග සබඳතා පවත්වා ඇති බවද ඒ සම්බන්ධ පරීක්ෂණ සිදුකරන මනම්පිටිය පොලිස් ස්ථානාධිපති ප්රධාන පොලිස් පරීක්ෂක බී.ජි.ඒ.සී ආරියරත්න අප කළ විමසීමකදී සඳහන් කළේය.
සැකකරුවන් සතුව තිබූ රෙදි පිළි තොගයක් සහ මුදලින් රුපියල් 73,000 ක් ද සොයාගැනීමට හැකියාව ලැබුණු බව පොලිසිය පවසයි.
සෝදිසියෙන් සිටි කුඩාවැව ආරක්ෂක කමිටුවේ සහයෝගය ඇතිව මෙම සැකකාර යුවළ අත්අඩංගුවට ගැනීමට හැකියාව ලැබී තිබේ.
සැකකාර යුවළ දළුකාන ගම්මානයේ අයිස් මත්ද්රව්ය වලට ඇබ්බැහි වූ කාන්තාවක් සමඟ සබඳතා පවත්වා ඇති බවට පාපොච්චාරණය කර ඇති අතර සැකකාර යුවළ අයිස් මත්ද්රව්ය ප්රදේශයට ගෙනවිත් අලෙවි කරන්නට ඇද්ද, නැතහොත් වෙනත් ජාවාරමකට පැමිණ ඇද්ද යන්න පුළුල් පරීක්ෂණ ආරම්භ කර ඇති බවද මනම්පිටිය පොලිස් ස්ථානාධිපති ප්රධාන පොලිස් පරීක්ෂක බී.ජි. ඒ.සී ආරියරත්න අප කළ විමසීමේදී වැඩිදුරටත් පැවසීය.
පොළොන්නරුව ජ්යෙෂ්ඨ පොලිස් අධිකාරී බුද්ධික මනතුංග ගේ උපදෙස් මත මනම්පිටිය පොලිස් ස්ථානාධිපති ප්රධාන පොලිස් පරීක්ෂක බී.ජි. ඒ.සී ආරියරත්න ඇතුළු පොලිස් නිලධාරී කණ්ඩායමක් සැකකරුවන් අත්අඩංගුවට ගෙන ඇති අතර ඔවුන් දෙදෙනා අද (06 )වෙනිදා පොළොන්නරුව මහේස්ත්රාත් අධිකරණයට ඉදිරිපත් කිරීමට නියමිතයි.
