ජනාධිපතිවරුන්ගේ හිමිකම් ඉවත් කිරිමේ පනත් කෙටුම්පත අද පාර්ලිමේන්තුවට ඉදිරිපත් කිරීම ව්යවස්ථා විරෝධී බවට විපක්ෂයෙන් තර්ක කිරීමත් සමග ඒ පිළිබඳ යම් සංවාද ශීලී තත්ත්වයක් අද පාර්ලිමේන්තුවේ දී ඇති වුනේය.
මුලින්ම මෙම විරෝධය ආණ්ඩුක්රම ව්යවස්ථාවේ සහ ස්ථාවර නියෝගවල වගන්ති උපුටා දක්වමින් මතු කරනු ලැබුවේ දයාසිරි ජයසේකර මන්ත්රීවරයා විසිනි. ඔහු මෙසේ පැවසුවේය.
ජනාධිපතිවරුන්ගේ හිමිකම් ඉවත් කිරිමේ 1986 අංක 4 දරණ පනත ඉවත් කිරිම සඳහා වූ කෙටුම්පත ඉදිරිපත් කරන්න හදනවා. විශේෂයෙන්ම ආණ්ඩුක්රම ව්යවස්ථාවේ 78.1 කරුණාකරලා බලන්න කියලා කතානායක තුමාට යෝජනා කරනවා. සෑම පනත් කෙටුම්පතක්ම පාර්ලිමේන්තුවේ න්යාය පත්රයට ඇතුළත් කිරීමට යටත් පිරිසෙයින් දවස් 07කට පෙර ගැසට් පත්රයේ පළ කළ යුතුය.
දවස් හතකට පෙර… 52.5 ස්ථාවර නියොග යටතේ පනත් කෙටුම්පත ගැසට් පත්රයේ පළ වූ දින සිට දින 07ක කාලයක් ඉකුත් වීමෙන් අනතුරුව කවර හෝ වේලාවක ඉහත 2 ඡේදයේ දක්වා ඇති යෝජනාව පාර්ලිමේන්තු න්යාය පත්රයට ඇතුළත් කරනු ලැබිය යුත්තේය.
එතකොට ගරු කතා නායක තුමනි මේකෙන් බොහොම පැහැදිලියි. 31 වැනිදා මේක ගැසට් පත්රයට ඇතුළත් කරන්නේ. නමුත් සාමාන්යයෙන් 31 වැනිදා අපි ගණන් ගන්නේ නෑ. ඇත්ත වශයෙන් 01 වැනිදා ඉඳලා සිට 07 වැනිදා දක්වා අද තමයි 07 වැනි දවස. දවස ඉකු වෙලා නෑ. මේකෙ බොහොම පැහැදිලිව තියනවා ගැස්ට පත්රයේ පළ වී දින 07ක් ඉකුත් වීමෙන් පසු… කියලා. අද රෑ 12ට තමයි දින 07 ඉකුත් වෙන්නේ.
මේ දින 07 සම්පූර්ණ වෙන්නේ. හෙට තමයි දින 07. මේක මම ඉල්ලීමක් කරනවා මේක පාර්ලිමේන්තුව රැස්වන වෙනත් දිනයක ගේන්න කියලා. අපිට ප්රශ්නයක් නෑ. නමුත් අපි මේ ප්රසීඩියර් එක කඩනවා නම් ඒක හොඳ තත්ත්වයක් නෙමෙයි. වැරදි විදිහට මේක පාර්ලිමේන්තුවට ගෙනාපු නිසා චැලේන්ජ් කරනකොටත් ප්රශ්නයක් වේවි. තව දවසක් එළියට ගියා කියලා ප්රශ්නයක් නෑ. මේක ගේන එකට අපේ විරෝධතාවයක් නෑ. කරන එක හරියට කරන්න.
මේක මූලික අයිතිවාසිකම් ප්රශ්නයක් තියනවා. 31 මේක ඉදිරිපත් කළාට 31 පළමු වෙනිදා තමයි පළමු දිනය ලෙස පත් වෙන්නේ. ඒ නිසා ඔබතුමාගෙන් ගෞරවයෙන් ඉල්ලනවා ආණ්ඩු ක්රම ව්යවස්ථාවේ 78.1 වගනන්තියත්, ස්ථාවර නියෝග 52.5 වගන්තියත් අවබෝධ කරගෙන වැඩ කරමු, මේක දවසක් ඉස්සරහට ගියා කියලා ප්රශ්නයක් වෙන්නේ නෑ…
දයාසිරි ජයසේකර මන්ත්රීවරයා පෙන්වා දුන්නේය.
ඒ අවස්ථාවේ දී අධිකරණ ඇමති හර්ෂණ නානායක්කාර පනත ඉදිරිපත් කිරීම සම්බන්ධව කරුණු පැහැදිලිකිරීමක් කරමින් මෙසේ කීවේය.
කතානායක – මේක බිස්සන් කමිටි එකෙත් කතා වුනා නේද?
ඇමති හර්ෂණ – ” ස්තුතියි ගරු මන්ත්රී තුමනි. මම හිතන්නේ 78.1 කියවන්නේ නැතිවම මෙතෙන්ට ආවා නෙමෙයි. ඒකෙ තියන දින 07 ගැන මට අවබෝධයක් තියනවා. මේක ගැසට් පත්රයේ පල වෙන්නේ 31 වැනිදා. ප්රින්ට් කරන්නේ 30 වැනිදා. පළ වෙන්නේ 30 මධ්යම රාත්රී 12න් පස්සේ. ඒ කියන්නේ 31 උදේ.
ඊලඟට ඔබතුමා තර්කනයක් ගෙනාවා 31 ගණන් ගන්නෙ නෑ කියලා. ඇයි ඒ. ඒකට හේතුවක් නෑ. ගණන් කරන්න වෙන්නේ ගරු මන්ත්රී තුමනි 31 ඉඳලා තමයි. 31 ඉඳලා ගණන් කළාම දවස් 07 සම්පූර්ණ වෙනවා 06 වැනිදාට. ඒ නිසා මේක හරි පටිපාටිය අනුව ගෙනත් තියෙන්නෙ. ඒ කරුණ නිසා මේක විරෝධතාවයට පදනමක් නෑ. මේක අද ඉදිරිපත් කිරීමට නෛතික බාධාවක් නෑ…
ඇමතිවරයාගේ පැහැදිලි කිරීමෙන් අනතුරුව සභානායකවරයාත් අද දිනයේ මේ පනත රැගෙන ඒමට ඇති නෛතික පදනම පෙන්වා දුන්නේය. ජනාධිපති නීතිඥ නිසාම් කාරියප්පර් සහ පාර්ලිමේන්තු මන්ත්රී චමින්ද විජේසිරි ද ආණ්ඩුවේ ස්ථාවරයට එරෙහිව කරුණු දැක්වූහ.
කෙසේ වෙතත් අවසානයේ දී ආණ්ඩුව ජනාධිපතිවරුන්ගේ හිමිකම් ඉවත් කිරීමේ පනත් කෙටුම්පත පාර්ලිමේන්තුවට ඉදිරිපත් කරනු ලැබුවේය.
