කොවිඩ්-19 සීමා කිරීම් උපුටා දක්වමින් චීනය වසර දෙකකට වැඩි කාලයක් නේපාලයෙන් භාණ්ඩ ආනයනය කිරීම තහනම් කර ඇති පසුබිමක, නේපාල භාණ්ඩ සදහා සියයට 98 ක් දක්වා තීරු බදු සහනයක් ලබා දීමට චීනය එකඟවීම පිළිබඳ ආර්ථික විශේෂඥයින් රැසක් සැක මතු කර තිබේ.
අදාළ එකගතාවය ඇතුළත් ගිවිසුම් සදහා අත්සන් තැබීම චීන විදේශ අමාත්ය වැන්ග් යී පසුගියදා නේපාලයේ සිදුකළ සංචාරය අතරතුරදී සිදුකෙරිණ.
මෙය චීනය, නේපාලයේ ආර්ථික සංවර්ධනයට ආධාර ලබාදීමෙන් නොනැවතී එරට වෙළෙඳාම ප්රවර්ධනය කිරීමට සහාය ලබාදීම සදහා ද ගත් හොඳ පියවරක් බව විශේෂඥ මතය වී තිබේ.
ඒ අනුව, නේපාලයට චීනයට සිදුකරන අපනයන ඉහළ නැංවීම හරහා චීනය සමග වන වෙළඳ හිඟය අඩු කිරීමට හැකි වනු ඇති බව ආර්ථික විශේෂඥයන් පෙන්වා දී ඇත.
එහෙත් එම විශේෂඥයන් වැඩිදුරටත් පෙන්වා දී ඇත්තේ මෙකී ගිවිසුම ප්රායෝගිකව ක්රියාත්මක වන්නේ කෙසේද යන්න ගැටළුවක් බවයි.
වසර දෙකකට වැඩි කාලයක් චීනය කොවිඩ් -19 මුවාවෙන් නේපාල නිෂ්පාදන රට තුළට ඇතුළු වීම වළක්වා ඇති බැවින්. නේපාලයේ සිට චීනයට කරන අපනයන පහළටම පාහේ පහත වැටී ඇති බව පෙන්වා දෙන නේපාල වාණිජ හා කර්මාන්ත මණ්ඩල සම්මේලනයේ උප සභාපති දිනේෂ් ශ්රෙස්තා සදහන් කරන්නේ මෙම ගිවිසුම රැවටිල්ලක් වීමට ද ඉඩ ඇති බවයි.
නේපාලය චීනයට සිදුකරන ප්රධාන අපනයනය වන්නේ සුවඳ දුම් කූරු, ලෝහ සහ ලී, නූඩ්ල්ස්, නිමි ඇඳුම්, සම්භාණ්ඩ, පදම් කළ සම්, තේ, තිරිඟු පිටි සහ ලොම් කාපට් වැනි නිෂ්පාදන වේ.
කොවිඩ් වසංගතයට පෙර, 2018 දී නේපාලය චීනය වෙත අපනයනය කළ භාණ්ඩවල වටිනාකම නේපාල රුපියල් බිලියන 2.10 ක් ලෙස වාර්තා වී තිබේ.
