පාස්කු ප්රහාරය සම්බන්ධව අපරාධ පරීක්ෂණ දෙපාර්තමේන්තුව සහ ත්රස්ථ මර්ධන හා විමර්ශන කොට්ඨාසය මගින් සිදුකරන ලද විමර්ශන අනුව සැකකරුවන් 747ක් මේ වනවිට අත් අඩංගුවට ගෙන එම සැකකරුවන් සහ සැකකාරියන් 100කට මහාධිකරණයේ නඩු 41ක් ගොනු කර ඇති බවත් නඩු 14කට අදාලව නීතිපති තුමා විසින් අධිචෝදනා ගොනු කර ඇති අතර තව දුරටත් පරීක්ෂණ සිදුකරමින් පවතින බවත් මහජන ආරක්ෂක සහ පාර්ලිමේන්තු කටයුතු පිළිබඳ ඇමති ආනන්ද විජේපාල අද (07) පාර්ලිමේන්තුවේ දී පැවසුවේය.
ඇමතිවරයා මේ බව හෙළි කළේ අජිත් ගිහාන් මන්ත්රීවරයා විසින් පාර්ලිමේන්තුවේ දී අසන ලද පැනයකට පිළිතුරු ලබා දෙමිනි.
පාස්කු ප්රහාරය සම්බන්ධව චැනල් ෆෝ නාලිකාවෙන් අනාවරණය වූ කරුණු ද, ඊට පරිබාහිරව වැඩිදුර විමර්ශනයේ දී අනාවරණයවන කරුණු ද පදනම් කරගෙන තවදුරටත් මෙම ප්රහාරය සම්බන්ධව විමර්ශන කටයුතු සිදුකරන බවත් ඇමතිවරයා පැවසුවේය.
ඒ තුළින් අනාවරණයවන කරුණු මත ඉදිරියේ දී නෛතික පියවර ගැනීමට නියමිත බවත් ඇමතිවරයා කීවේය. වත්මන් රජය බලයට පත් වූ පසු විමර්ශන නව අදියරකින් ආරම්භ වී ඇති බවත්, මෙම නව විමර්ශන සම්බන්ධව පසුගිය නොවැම්බර් 11වැනි දින කොටුව මහේස්තාත් අධිකරණය වෙත නඩු අංක B35882/2024 යටතේ කරුණු වාර්තා කළ බවත් විමර්ශනය ඉතා විධිමත්ව පවත්වාගෙන යන බවත් ඔහු පැහැදිලි කළේය.
මේ දක්වා කරන ලද විමර්ශන අනුව විමර්ශනයේ දී සිවිල් සාක්ෂි කරුවන් 12ක්, හමුදා සාමාජිකයින් 07ක්, පොලිස් නිලධාරීන් 26ක් සහ බන්ධනාගාර නිලධාරීන් 03ක් ඇතුළු 48 දෙනෙකුගෙන් මේ වනවිට ප්රකාශ සටහන් කරගෙන වැඩිදුර විමර්ශන කටයුතු කරගෙන යන බව ද මහජන ආරක්ෂාව පිළිබඳ ඇමතිවරයා පැවසුවේය.
