මනම්පිටිය නිමල් ජයරත්න –
ජනතා පීඩක ආණ්ඩුව වහාම ඉවත් වන ලෙසටත්, ජනතාවට පැට වී තිබෙන ජීවන බර වහාම අඩු කරන ලෙසටත් බලකරමින් දිඹුලාගල ආරණ්ය සේනාසනයේ භික්ෂූන් වහන්සේලා පිරිසක් සහ දිඹුලාගල බුද්ධ ශ්රාවක සංඝ සභාවේ විහාරාධිපති ස්වාමීන් වහන්සේලා මෙන්ම සාමණේර හිමිවරු හැත්තෑනමක් පාගමනින් වැඩම කරවා පොළොන්නරුව මනම්පිටිය මහවැලි පාලම උඩ අද ( 13 ) සවස 3 ට පමණ විරෝධතාවයක නිරත වූහ.
ජනාධිපති, අගමැති, ප්රමුඛ කැබිනට් මණ්ඩලය මෙන්ම එදා ,මෙදා, පැවති සියලු රජයන් වසර 74 ක සිදු කළ විනාශයට වගකිව යුතු බවත්, වත්මන් ආණ්ඩුව ජනතාවගේ ගැටලු හා දුක්කම් කටොලු තේරුම් නොගෙන සුර සැප විඳින බවත් උන්වහන්සේලා පැවසූහ.
ජනතාව විශාල පිරිසක් දැඩි ආර්ථික පීඩනයට පත්ව සිටින බවත්, මෙම තත්ත්වය මත ආණ්ඩුව ප්රමුඛ ජනාධිපතිවරයාත්, අගමැතිවරයාත්, ඉල්ලා අස් වී රටෙහි වෙනත් පාලන තන්ත්රයක් ඇති කරන ලෙසත් දිඹුලාගල බුද්ධ ශ්රාවක සංඝ සභාවේ ලේඛකාධිකාරී දිඹුලාගල රාහුලාලංකාර නාහිමියෝ මෙහිදී සඳහන් කළහ.
රට හා ජනතාව පත්ව ඇති ආර්ථික පීඩනය නිසා දිඹුලාගල ආරණ්ය සේනාසනයට අනුබද්ධිත වෙහෙර විහාරස්ථාන රැසක වැඩ වාසය කරන භික්ෂූන් වහන්සේලාට දානමාන නොලැබෙන බවත්, මෙම තත්ත්වයට වගකිව යුත්තේ වත්මන් රජය බව ද රාහුලාලංකාර නාහිමියෝ පැවසූහ.
වත්මන් ජනාධිපති ගෝඨාභය රාජපක්ෂ විශ්වාස කරමින් රටේ හැට නව ලක්ෂයක් මෙන්ම මහා සංඝරත්නය ආශිර්වාද සිදු කරමින් ඔහුට මනාපය ලබා දුන්නේ රට වැටී ඇති අගාධයෙන් ගොඩ ගැනීමට නමුත් මෙම තත්ත්වය පසෙකලා රාජපක්ෂවරු රටේ සියලු දේපල ඇමරිකාවට, චීනයට, මෙන්ම ඉන්දියාවට විකුණා දැමීමට සැලසුම් කරන බවත්, සියලු රාජපක්ෂවරු ආණ්ඩුවෙන් ඉවත් වී ඔවුන්ගේ නිජබිම් වන ඇමරිකාවට යන ලෙසටත් නාහිමිවරුන් සඳහන් කළහ.
ජනාධිපතිවරයා ඉල්ලා අස්නොවුනහොත්, පොළොන්නරු දිස්ත්රික්කයේ සියලු ගොවීන් මෙන්ම, මහා සංඝරත්නය එක්ව මීට වඩා දැඩි ක්රියාමාර්ග ගන්නා බවත් නාහිමිවරු මෙහිදී රජයට දැන්වූහ.
මෙම අවස්ථාවට දිඹුලාගල බුද්ධ ශ්රාවක සංඝ සභාවේ ලේඛකාධිකාරී දිඹුලාගල රාහුලාලංකාර, දිඹුලාගල ආරණ්ය සේනාසනයේ උතුරු ශාසනාරක්ෂක බල මණ්ඩලයේ ලේඛකාධිකාරී අත්තනකඩවල ජනතාලංකාර, ඇල්ලේවැව අශෝකාරාමාධිපති මහනුවර විචිත්රලංකාර යන නාහිමිවරුන් මෙන්ම ප්රදේශයේ විහාරස්ථානවල විහාරාධිපති ස්වාමීන් වහන්සේලා, දිඹුලාගල මහා කාශ්යප මහා පිරිවෙනේ සාමණේර භික්ෂූන් වහන්සේලා මෙන්ම විශාල පිරිසක් වැඩම කර සිටියහ.
