පැවැති රජය විසින් ජපාන ආයෝජන කිහිපයක් අවලංගු කිරීම සමඟ බිඳ වැටුණු ජපන් ශ්රී ලංකා සබඳතා පිළිබඳ කණගාටුව පළ කරන බව ජනාධිපති රනිල් වික්රමසිංහ අද ජපන් විදේශ ඇමති යොෂිමාසා හයාෂි (Yoshimasa Hayashi) අමතා පැවසූ බව ජනාධිපති මාධ්ය අංශය වාර්තා කරයි.
එමෙන්ම පසුගිය රජය විසින් එලෙස අවලංගු කළ ලංකාවට වඩාත් අත්යාවශ්ය එම ව්යාපෘති නැවත වතාවක් ආරම්භ කිරීමට තම රජය අපෙක්ෂා කරන බවද ජනාධිපතිවරයා අවධාරණය කර ඇතැය ද ජනාධිපති මාධ්ය අංශය විසින් නිකුත් කළ නිවේදනයේ දැක්වේ.
ජනාධිපතිවරයා මේ බව පවසා ඇත්තේ අද (27) පෙරවරුවේ ජනාධිපති රනිල් වික්රමසිංහ හා ජපාන විදේශ අමාත්ය යොෂිමාසා හයාෂි අතර ටෝකියෝ නුවරදී පැවති සාකච්ඡාවේ දී ය.
ශ්රී ලංකාව ජාත්යන්තර මූල්ය අරමුදල සමඟ පැවැත්වෙන සාකච්ඡාව සම්බන්ධව ප්රධාන වශයෙන් අවධානය යොමු කළ මෙම සාකච්ඡාවේ දී ශ්රී ලංකාවේ ණය ප්රතිව්යුහගත කිරීම සඳහා ණය හිමියන් සමඟ කරන සාකච්ඡාවලදී ප්රමුඛ කාර්ය භාරයක් ඉටු කිරීමට ජපන් රජය සූදානම් බව ද ජපාන විදේශ කටයුතු අමාත්ය යොෂිමාසා හයාෂි (Yoshimasa Hayashi) පවසා තිබේ.
සාකච්ඡාව අතරතුර ශ්රී ලංකාවේ පුනර්ජනනීය බලශක්ති ව්යාපෘති සඳහා ජපාන ආයෝජන බලාපොරොත්තු වන බව ජනපතිවරයා පවසා ඇත.
මෙහිදී ජපාන විදේශ අමාත්යවරයා පෙන්වා දී ඇත්තේ , ජපානය පුනර්ජනනීය බලශක්තිය සඳහා වැඩි නැඹුරුතාවයක් දක්වමින් ශ්රී ලංකාවේ අනාගත අයෝජන අවස්ථා සලකා බැලීමට කැමැත්තෙන් සිටින බවයි.
2023 වර්ෂයට ශ්රී ලංකාවේ පුහුණු ශ්රමිකයන් සඳහා ජපානයේ වැඩි රැකියා අවස්ථාවක් සැලසීමට මේ වන විටත් කටයුතු ආරම්භ කර ඇති බවද විදේශ අමාත්යවරයා කරුණු දක්වමින් කියා සිටියේය.
ජාත්යන්තර කටයුතුවලදී ජපානය ලබාදෙන සහාය අගය කළ ජනාධිපතිවරයා එක්සත් ජාතීන්ගේ ආරක්ෂක කවුන්සිලයේ නිත්ය සාමාජිකත්වය දැරීමට ජපානය හා ඉන්දියාව ගෙනයන උත්සාහයට සහයෝගය දැක්වීමට අපේක්ෂා කරන බවත් පැවසීය.
ජනාධිපතිවරයගේ එම ප්රකාශය පිළිබඳ ප්රශංසා කළ ජපාන විදේශ අමාත්යවරයා ලෝක වේදිකාවේ ආසියාවේ නියෝජනය පුළුල් කළ යුතු බව තවදුරටත් අවධාරණය කර සිටියේය.
