පවුල් ආරවුලක් හේතුවෙන් ගිනි තැබූ නිවසක ගින්නට හසුවී දැඩි පිලිස්සුම් තුවාල ලබා රෝහල්ගත කර සිටි ගලෙන් බිඳුන වැව සිවු දෙනා අතරින් 15 හැවිරිදි පවුලේ වැඩිමහල් දියණියත් අද (10) මිය ගොස් ඇතැයි අනුරාධපුර රෝහල් ආරංචි මාර්ග පවසයි.
මිය ගිය දියණියගේ පශ්චාත් මරණ පරික්ෂණය අද සවස පැවැත්වීමට නියමිතව ඇත.
පසුගිය (06) වැනිදා සිදුවු මෙම ගිනි තැබීමෙන් නිවසට ගිනි තැබු 43 හැවිරිදි පියා සහ 13 හැවිරිදි ඔහුගේ දියණිය එම ස්ථානයේම මියගොස් තිබිණි. මෙම පුද්ගලයාගේ 36 හැවිරිදි බිරිය රෝහලට රැගෙන ගිය පසු එදිනම මිය ගොස් තිබුණු බව ගලෙන්බිඳුනවැව පොලිසිය පැවසුවේය.
දැඩි පිළිස්සුම් තුවාල සහිතව මිය ගිය පුද්ගලයාගේ 66 හැවිරිදි බිරියගේ මව, 20 හැවිරිදි පුතා තව දුරටත් අනුරාධපුර ශික්ෂණ රෝහලේ ප්රතිකාර ලබමින් සිටිති.
ගලෙන්බිඳුණුවැව පොලිස් වසමේ, නුවරගම් කොළනිය, පඩිකාරමඩුව ප්රදේශයේ සිදු වූ මේ අපරාධයෙන් මේ වනවිට ජිවිත 04ක් අහිමි වි තිබේ.
මෙම පවුලේ අඹුසැමියන් නිරන්තර ආරවුල් සහිතව ජීවත් වූ බවත්, සැමියාගේ අධික බීමත්කම නිසා ඇති වු පවුල් ආරවුල් අවස්ථා දෙකක දී පොලිසිය මැදිහත්ව සමතයකට පත් කර ඇති බවත් වාර්තා වේ.
