ඇදහැලෙන ධාරාණිපාත වර්ෂාව සමග ගල්ඔයේ ඛාදනය වී ඇති ඉවුරු බිඳී යෑමේ අවදානම සැලකිල්ලට ගෙන ඉවුරු පහළ ප්රදේශයේ පිහිටි සුදුවැල්ල ගම්මානයේ පවුල් සීයක් පදිංචි ස්ථානවලින් ඉවත් කර ප්රදේශයේ විහාරස්ථානයක ලැගුම් ගැනීමට සලස්වා ඇතැයි අම්පාර දිස්ත්රික් ලේකම් චින්තක අබේවික්රම පවසයි.
මේ වනවිට බරපතල ලෙස සිදුවී ඇති ගල් ඔයේ ඉවුරු බිඳී ඛාදනය වීම වාර්තා වන්නේ කොටවෙහෙර ප්රදේශයෙනි.
මේ ඛාදනය කලක සිට සිදුවෙමින් පැවතුන ද එහි විශාලම අවදානම අද වනවිට මතුව තිබුණේ පවතින අධික වර්ෂාව හේතුවෙන් ගල් ඔයේ ජල ධාරිතාව ඉහළ යෑමෙන් බව දිස්ත්රික් ලේකම්වරයා පවසයි.
අම්පාර සේනානායක සමුද්රයේ ජල ධාරිතාව වේගයෙන් ඉහළ යමින් පවතින බවත් අක්කර අඩි හත් ලක්ෂ හැත්තෑ දහසක ධාරිතාවක් සහිත සේනානායක සමුද්රයේ මේ වනවිට අඩි 103ක් වූ උසකින් ජලය පිරී ඇති බව වාර්මාර්ග දෙපාර්තමේන්තුව දන්වා ඇත. උපරිම ජල ධාරිතාව අඩි 110 දී වාන් දොරටු විවෘත කිරීමට නියමිතව තිබේ. එම ජල කඳ ගල්ඔයට ගලා යන අතර ඒ සමග ඔයේ ඉවුරු කැඩී ගොස් බරපතල ව්යසනයක් ඇතිවීමේ අවදානමකට දැන් ප්රදේශවාසීහු මුහුණ දී සිටිති.
දැනට ඉපිල් ඇලේ කොටසක් කැඩි ගොස් ගල්ඔයේ ඉවුර ඛාදනය වී ගගේ ඉවුරු ඔස්සේ සැකසී ඇති මාර්ගය ද විනාශ වී ඇත. ඉදිරියේ දී ඇති විය හැකි තත්ත්වය කුමණ මුහුණුවරක් ගනු ඇතිදැයි සිතිය නොහැකි වුව ද මේ වනවිට ප්රාදේශීය ලේකම්වරුන් සමග එක්ව ජන ජීවිත අවදානමෙන් ගලවා ගැනීම සඳහා මූලික වැඩසටහන් දියත් කර ඇතැයි දිස්ත්රික් ලේකම්වරයා පවසයි.
“ශ්රී ලංකා යුද හමුදාවේ 24 සේනාංකයත්, අම්පාර ප්රාදේශීය ලේකම්වරයාත් එතන ගිහින් බැලුවා. ගංගාව ඛාදනය වී ඇති ආකාරය බැලුවහම වැලි කොට්ටගහලා තාවකාලිකව රඳවා ගන්න බෑ. ඒ තරම් විශාල ප්රමාණයක් ගඟේ ඉවුර ඛාදනය වෙලා තියනවා
මේ වෙලාවේ අපට ඉතිරි වෙලා තියන විකල්පය තමයි ගංගාවේ එක් පැත්තක එකතු වෙලා තියන වැලි නිධිය කපා දැමීම… එමෙ කරලා ගඟේ වතුර පාර බන්ට් එකේ වැදීම අවම කර ගත හැකි වේවි කියලා අපි උපකල්පනය කරනවා. කෙසේ වෙතත් ප්රාදේශීය ලේකම්වරු ඇතුළු අපි කණ්ඩායම සූදානමින් ඉන්නවා යම් ආකාරයකින් ආපදා තත්ත්වයක් ඇති වුනොත් ජන ජීවිත ආරක්ෂා කරගන්න…”
