විනාඩි කීපයක් තිස්සේ වේගයෙන් හමන සුළං ප්රවාහයක් පැය කීපයක් තිස්සේ අඛණ්ඩව ඇද හැලෙන වැසි රටාවක් කොළඹ විකල් කිරීමට ප්රමාණවත්ය. අග නගරය ඇත්තේ ඒ තරම් සැලසුම් රහිතවය. ඊයේ රාත්රියේ හමා ගිය සුළඟ ආන්තික තත්ත්වයකදී ඇති විය හැකි ස්වරූපය සම්බන්ධ ඉඟි කළ බව සිතමු.
කොළඹට හැමු තද සුළඟ කුමක්ද?. මේ සුළඟ එකවර ඇති වූයේ ඇයි.
ආපදා කළමනාකරණ මධ්යස්ථානයේ නියෝජ්ය අධ්යක්ෂ ප්රදීප් කොඩිප්පිලි බීබීසී සිංහල වෙත ප්රකාශ කර තිබුණේ කාලගුණ විද්යා දෙපාර්තමේන්තුව තද සුළං පිළිබඳ අනතුරු ඇඟවීම් එම තත්ත්වය ඇතිවීමට පෙර සිට ම ජනතාවට දැනුම් දුන් බවය.
අනෙක් අතින් කාලගුණ විද්යා දෙපාර්තමේන්තුව පෙන්වා දෙන්නේ දිවයිනට ඈතින් ත්රීකුණාමලයේ සිට ඊසාන දිසාවට මුහුදේ පැවති අඩු පීඩන කලාපය පීඩන අවපාතයක් බවට පත් වෙමින් බංගලාදේශයේ වෙරළබඩ තීරයට ඇතුළු වීම තද සුළං තත්ත්වයක් ඇති වීමට හේතු වූ බව ය.
කාලගුණ විද්යා දෙපාර්තමේන්තුවේ අධ්යක්ෂ ජනරාල් අතුල කරුණානායක එය මෙසේ පැහැදිලි කළේය.
“පහළ පෘෂ්ඨයන් වෙනස් වෙනකොට ඔය ආකාරයේ සුළං තත්ත්වයන් ඇති වෙනවා. ඒ නිසා තමයි අධික සුළං තත්ත්වයක් නිර්මාණය වුණේ. නමුත් ඒක දැන් බංග්ලාදේශ වෙරළබඩ තීරයට ඇතුළු වෙලා ක්රමයෙන් දුර්වල වෙමින් පවතිනවා,”
පීඩන අවපාතය බංග්ලාදේශය වෙත ගමන් කළ ද ශ්රී ලංකාවට තවදුරටත් ඉන් වක්ර බලපෑම් පවතින බව කී අධ්යක්ෂ ජනරාල්වරයා මේ බලපෑම හේතුකොට ගෙන දිවයිනේ බස්නාහිර, සබරගමු, වයඹ, මධ්යම පළාත්වලත්, ගාල්ල සහ මාතර දිස්ත්රික්කවලත් තවදුරටත් කඩින් කඩ වැසි හෝ ගිගුරුම් සහිත වැසි ඇතිවන බව පෙන්වා දුන්නේය. ඔහුට අනුව ඇද හැලෙන්නේ ධාරණිපාත වර්ෂාවකි. සබරගමු පළාත, නුවර, නුවරඑළිය, ගාල්ල සහ මාතර යන දිස්ත්රික්කවල ඇතැම් ස්ථානවලට ඇද හැලෙන වර්ෂාව මිලිමීටර් 100 ඉක්මන තරම්ය.
“මීට අමතරව දිවයින තුළ තියෙන සුළං තත්ත්වයේ වැඩි වීමකුත් තියෙනවා. සුළඟ වැඩි වෙන්නේ විශේෂයෙන් ම වයඹ, උතුරු මැද, ඊට අමතරව මධ්යම කඳුකරයේ බටහිර බෑවුම් පැත්ත, පුත්තලම සහ හම්බන්තොට වගේ දිස්ත්රික්කවල. සුළඟ ප්රධාන වශයෙන් නිරිත දිශාවෙන් හමනවා. මේ සුළඟේ වේගය පැයට කිලෝමීටර 50 -60 දක්වා ඉහළ යෑමේ හැකියාවක් තියනවා. මේ තත්ත්වය තව දින දෙකක් තියේවි. ජූනි මස 02 සිට මේ ස්වරූපයේ වෙනසක් අති වෙන්න පුලුවන්” අධ්යක්ෂ ජනරාල්වරයා බීබීසී වෙත ප්රකාශ කර තිබිණි.
අද තත්ත්වය
අද (මැයි 30) බස්නාහිර, සබරගමුව, මධ්යම සහ වයඹ පළාත්වලත් ගාල්ල සහ මාතර දිස්ත්රික්කවලත් විටින් විට වැසි හෝ ගිගුරුම් සහිත වැසි ඇති වන බව කාලගුණ විද්යා දෙපාර්තමේන්තුව පැවසීය.
එම දෙපාර්තමේන්තුව අනතුරු ඇඟවූයේ, බස්නාහිර සහ සබරගමුව පළාත්වලත් නුවරඑළිය, මහනුවර, ගාල්ල සහ මාතර දිස්ත්රික්කවලත් ඇතැම් ස්ථානවල මි.මී. 100ට වැඩි තද වැසි ඇතිවිය හැකි බව ය.
උතුරු-මැද පළාතේත් මන්නාරම සහ හම්බන්තොට දිස්ත්රික්කවලත් වැසි වාර කිහිපයක් ඇති විය හැක.
නිරිතදිග මෝසමට සක්රීයවන ශ්රී ලංකාවේ මනරම් දිය ඇලි ගැන ඔබ දන්නවාද?
මධ්යම කඳුකරයේ බටහිර බැවුම් ප්රදේශවලත් උතුරු, උතුරු-මැද සහ වයඹ පළාත්වලත් හම්බන්තොට, සහ ත්රිකුණාමලය දිස්ත්රික්කවලත් විටින් විට හමන පැ.කි.මී. (50-60)ක පමණ තද සුළං ඇතිවිය හැකි බව ද කාලගුණ විද්යා දෙපාර්තමේන්තුව පැවසීය.
දිවයිනේ සෙසු ප්රදේශවල විටින් විට හමන පැ.කි.මී. (30-40)ක පමණ තරමක තද සුළං ඇතිවිය හැකි බවට එම දෙපාර්තමේන්තුව වැඩිදුරටත් පැවසීය.
