කොවිඩ් ආසාදිත පුද්ගල මරණ භූමදානය කිරීම සම්බන්ධව සෞඛ්ය අමාත්යාංශයේ ලේකම් එස්.එස් මුණසිංහ විසින් පත් කළ විද්වත් කමිටුව කොවිඩ් ආසාදිතව මිය යන පුද්ගලයන්ගේ මෘත දේහයන් භූමදානයට ද අනුමැතිය ලබා දී ඇත.
ඇය ඇතුළු විද්වත් සාමාජිකයන් 09 දෙනෙක් විසින් සකස් කළ මෙම වාර්තාව දෙසැම්බර් 24 වනදා වනවිට සම්පාදනය කර නිමා වූ බවත් එහි අවසන් වාර්තාව පසුගිය දෙසැම්බර් මස 28 දා සෞඛ්ය අමාත්යාංශයට භාර දුන් බවත් එම විද්වත් කමිටුවේ සභාපති ලෙස කටයුතු කළ ශ්රී ලංකා එන්නත් හා බෝවන රෝග පිළිබඳ සංසදයේ හා ශ්රී ලංකා වෛද්ය සංගමයේ හිටපු සභාපති ජ්යෙෂ්ඨ මහාචාර්ය ජෙනිෆර් පෙරේරා හිරු රූපවාහිනී නාලිකාව සමග සම්මුඛ සාකච්ඡාවකට එක් වෙමින් ප්රකාශ කළාය. එහෙත් එහි අන්තර්ගතය ඊයේ වනතුරුත් සමාජයට අනාවරණය වුනේ නැත.
එම වාර්තාවෙන් භූමදානය හා ආදාහනය දෙපාර්ශවයට කැමති ආකාරයට කරගත හැකි බව තමන් අතුළු කමිටුව නිර්දේශ කළේ යැයි මහාචාර්යවරිය කීවාය.
එහිදී භූමදානය කිරීමේ දී පිළිපැදිය යුතු නිර්දේශ හතක් ඉදිරිපත් කළ බව ද ඇය පැහැදිළි කළාය. එම නිර්දේශ මෙසේය.
- මෘත දේහය එම්බාම් කිරිමක් හෝ නිවසට රැගෙන යාම කළ නොහැකියි
- භූමදානය හෝ ආදාහනය පැය 24ක් තුළ කළ යුතුය
- භූමදානය කරන සිරුර ජලයට නිරාවරණය නොවන ලෙස මල සිරුරූ බහාලන බෑග් දෙකක දමා මිනීපෙට්ටියක තැන්පත් කළ යුතුය
- පවුලේ ඥාතින් 04 දෙනෙකුට මිනිත්තු 05 ක කාලයක් සඳහා මෘත දේහය බැලීමට අවසර දිය යුතුයි
- මිනි පෙට්ටියට බාහාලිමෙන් පසු කිසිම හේතුවක් නිසා එය විවෘත නොකළ යුතුය
- භූමදානයේ දී නිසි බලධාරියා ලෙස සෞඛ්ය අමාත්යාංශයේ නිලධාරියෙක් පත් කළ යුතු අතර ඔහු එය අධීක්ෂණය කළ යුතුය
- ආගමික නායකයෙකුට ආගමික කටයුතු සඳහා අවසර දිය යුතුයි.
මෙහිදී සභාපතිනිය කීවේ භූ ගත ජලයට වෛරසය ඇතුළු වෙනවාද නැද්ද යන්න ලංකාවේ දී පරීක්ෂණ නොකළත් මේ හා සමාන වෛරස පිළිබඳව ලෝකයේ පරීක්ෂණය කර ඇති බවත් මේ තීන්දුව ගත්තේ එම සියලු දත්ත පරිශීලනයෙන් බවත්ය.
