හැටන් රංජිත් රාජපක්ෂ –
කොත්මලේ හැදුණුවැව වෑතලාව ප්රදේශයේ ක්රීඩාංගණයෙන් මතුවන අද්භූත ශබ්දය පිළිබඳව පරීක්ෂණයක් සිදුකිරීම පේරාදෙණිය භූ විද්යා හා පතල් කැණීමේ ඒකකයේ භූ ගර්භ විද්යාව පිළිබඳ හිටපු මහාචාර්ය අතුල සේනාරත්න මහතාගේ සහභාගිත්වයෙන් (19) දින සිදු කෙරිණ.
පසුගිය දින කිහිපය තුළ කොත්මලේ හැදුනුවැව වෑතලාව ප්රදේශයේ පිහිටි ක්රීඩාංගණයෙ පොළොවෙන් මහා විශාල ශබ්දයක් නැගෙන බව සහ ඒ පිළිබඳ සොයා බලා කඩිනම් විසඳුමක් ලබාදෙන ලෙස ජනතාවගෙන් ලැබුණු ඉල්ලීම මත නුවරඑළිය දිස්ත්රික් ලේකම් නන්දන ගලබඩ මහතාගේ ඉල්ලීම පරිදි පේරාදෙණිය භූ විද්යා හා පතල් කැනීම් ඒකකය නිලධාරීන් නිළ වශයෙන් පැමිණෙන තුරු ජනතාවගේ භීතිය තුරන් කිරීමේ අරමුණින් භූ විද්යා හා පතල් කැනීම් ඒකකයේ හිටපු ප්රධානියෙකු හා භූ ගර්භ විද්යාව පිළිබඳ මහාචාර්ය අතුල සේනාරත්න මහතාගේ සහභාගිත්වයෙන් මෙම භූමි පරීක්ෂණය සිදු කෙරිණ.
මෙහිදී ආන්දෝලනයට තුඩුදුන් භූමිය පරික්ෂා පරීක්ෂා කිරීමක් සිදු කෙරුණු අතර, එහි තත්ත්වයන් පිළිබඳව හා ඇසෙන ශබ්දයට හේතුව පිළිබඳව ප්රදේශවාසීන් දැනුවත් කිරීමට මහාචාර්ය අතුල සේනාරත්න මහතා කටයුතු කලේය.
පෙර වැවක් තිබුණු ප්රදේශයක් බැවින් එම ප්රදේශයේ යටින් ජල කාන්දු වීමක් දක්නට ලැබෙන අතර , එය වර්තමානයේ බරපතළ තත්ත්වයක් නොවන බවත්,ඉදිරියට එය බරපතළ තත්ත්වයක් දක්වා නිර්මානය විය හැකි ප්රවණතාවයක් ඇති බවද මහාචාර්යවරයා පැවසිය.
කෙසේ වෙතත් ප්රදේශවාසීන් ඉල්ලා සිටින්නේ නිල වශයෙන්ම භූමිය පරීක්ෂාකර භූ විද්යා හා පතල් කැනීමේ ඒකකයෙන් පරීක්ෂණ වාර්තාවක් ලබාදෙන ලෙසයි.
මෙම අවස්ථාව සඳහා නුවරඑළිය දිස්ත්රික් ලේකම් නන්දන ගලබඩ මහතා , කොත්මලේ ප්රාදේශීය ලේකම් නදීර ලක්මාල් මහතා සහ ප්රදේශය නියෝජනය කරන රාජ්ය නිලධාරීන් සහභාගී වී සිටිහ
