කෙහෙල්බද්දර තරුණයා   ඝාතනයෙන් වසරක් පිරෙන දා  ලෙයට ලෙය   ගන්නට  ගොස් වැරදුන කෙහෙල්බද්දර පද්මේ ගේ සැලසුම!

වැලිවේරිය ඇඹරළුව ප්‍රදේශයේ දී පෙරේදා (05) උදේ සිදු කළ වෙඩි තැබීම  දැනට ඩුබායිහි සිටින කෙහෙල්බද්දර පද්මේ නැමැති පාතාල ප්‍රබලයා විසින් සැලසුම් කළ ඝාතන තැතක් බව ඒ පිළිබඳ විමර්ශනය කරන විමර්ශන අංශ හෙළි කරගෙන තිබේ.

මීට වසරකට පෙර එනම් 2022.08.06 දින ගම්පහ කෙහෙල්බද්දර ප්‍රදේශයේ කොණ්ඩාකපන ස්ථානයක දී තරුණයෙක් වෙඩි තබා ඝාතනය කිරීමේ පලිය ගැනීම සඳහා එම තරුණයා ඝාතනය කර හරියටම වසරක් සම්පූර්ණවන දිනයට පෙර දිනයේ   මෙම ඝාතනය සැලසුම් කර ඇතැයි   විමර්ශන ආංචි මාර්ග කියයි.

පසුගිය වසරේ අගෝස්තු 06 වැනිදා  වෙඩි තබා ඝාතනය කරනු ලැබූ එම 22 හැවිරිදි තරුණයා මෙම කිසිම ගැටුමක් පිළිබඳව මෙලෝ හසරක් නොදන්නා අහිංසකයෙකි.  කෙහෙල්බද්දර පද්මේ ගේ ඥාති පුතෙක් ඝාතනය කිරීමට පැමිණි ඝාතකයන්ට ඉලක්කය වැරදී මෙම අහිංසක තරුණයා මරා දමා තිබිණි. මෙම ඝාතනයෙන් වසරක් යන්නට පෙර එහි පලිය ගන්නා බව කෙහෙල්බද්දර පද්මේ විසින් සිය ගෝලයින් වෙත කියා ඇතැයි ද විමර්ශන අංශ වෙත වාර්තා වී ඇත.

මෙම තරුණයා ඉලක්ක වන්නේ පස්පොඩ්ඩා ගම්පහ දී ඝාතනය කළ පලිය ගැනීම සඳහා දැනට විදේශගතව සිටින මාකිලංගමුවේ සංජීව විසින් මෙහයවූ ඝාතනයක වැරදී ගිය ගොදුරක් ලෙසින් බව පොලිසිය විශ්වාස කරයි.

කෙහෙල්බද්දර කොන්ඩාකපන ස්ථානයේ සිදුවූ ඝාතනය සම්බන්ධව පොලිසිය සහ විශේෂ කාර්ය බලකාය එක්ව පුද්ගලයින් කීප දෙනෙක් අත්අඩංගුවට ගෙන තිබිණි. පස්පොඩ්ඩාගේ රියදුරු බව කියන 24 හැවිරිදි  “වේග බ්ට්ටා” නමින් හඳුන්වන  උඩුගම්පල මාදෙල්ගමුව ප්‍රදේශයේ පදිංචි තරුණයා ද මෙසේ අත් අඩංගුවට ගත් එක් තැනැත්තෙකි.

ඝාතනය සම්බන්ධව අත්අඩංගුවට ගෙන ඇප පිට නිදහස් වී සිටින මේ පුද්ගලයාව ඉලක්ක කරගෙන පෙරේදා වෙඩි තැබීම සිදුවී ඇති බවත්, ඔහුට වෙඩි තබා ඇතතේ වැලිවේරියට ගෙන්වාගෙන බවත් විමර්ශන අංශ හෙළි කරගෙන ඇත.

මුහුණුපොත හරහා සතියකට පමණ පෙර  මුණගැසුන කාන්තාවකගේ ආරාධනාවකට මේ තැනැත්තා වැලිවේරියට ගොස් ඇත්තේ පද්මේ ගේ  ඝාතන සැලසුමක ගොදුරක් ලෙසය.  මෝටර් රථයකින් කාන්තාව හමුවන්නට ගිය පුද්ගලයාට යතුරුපැදියකින් පැමිණි දෙදෙනෙක් වෙඩි ප්‍රහාර එල්ල කර ඇත.

ඔහු ඉලක්ක කරගෙන වෙඩි දෙක්ක තබා ඇති බවත්, ඉන් එක් වෙඩිල්ලක් අතට වැදී ඇති අතර අනෙක් වෙඩිල්ල ඔහු වැදී නැති බවත්, තුන්වන වෙඩිල්ල තබන්නට යෑමේ දී ගිනි අවිය ක්‍රියා විරහිත වී ඇති බවත් විමර්ශන අංශ කියයි.

ගිනි අවිය ක්‍රියා විරහිත විමත් සමග කලබලයට පත් වෙඩික්කරුවන්ට ඔවුන් පැමිණි යතුරුපැදිය පණ ගන්වා ගැනීමට නොහැකි වී ඇත.

මේ සමගම යතුරුපැදිය අත්හළ ඝාතකයින් ගිනි අවිය පෙන්වා ලොරියක් නවත්වා එම ලොරියේ නැගී කන්දකපාපු හන්දියට පැමිණ කොළඹ දෙසට ධාවනය වූ බස් රථයකින් කඩවත ආසන්නයට විත් පලා ගොස් ඇතැයි තොරතුරු අනාවරණය වී ඇත.

පොලිිසිය විමර්ශන පවත්වයි.