කෙරවලපිටිය යුගදනවි විදුලි බලාගාරයේ 40% කොටස් අමෙරිකානු සමාගමකට ලබාදීම සඳහා එළැඹි ගිවිසුම පිළිබඳව සාකච්ඡාවක් ආණ්ඩුවේ හවුල්කාර පක්ෂවල නියෝජිතයන් සහ අග්රාමාත්ය මහින්ද රාජපක්ෂ අතර පැවති සාකච්චාවේ දී එම පක්ෂ නායකයන් මේ ගිවිසුමට සහ එය අත්සන් කළ ක්රමවේදයට බරපතල විරෝධය දක්වා ඇතැයි වාර්තා වේ.
සාකච්ඡාවෙන් පසු අමාත්ය විමල් වීරවංශ කීවේ ජනාධිපතිවරයා යළි දිවයිනට පැමිණි පසු අදාළ ගිවිසුම පිළිබඳ තවදුරටත් සාකච්ඡා කිරීමට අපේක්ෂා කරන බවය. “ ආණ්ඩුවේ මතයයි අපේ මතයයි වෙනස්…“ ඔහු වැඩිදුරටත් කීවේය.
ජල සම්පාදන අමාත්ය වාසුදේව නානායක්කාර කීවේ එල්.එන්.ජී බලාගාරය කළ යුත්තේ දේශීය සම්පත් පිටට යන ආකාරයට නොවන බවය.
“සන්ධානයේ ඔක්කොම නායකයෝ ටික එකතු කරලා සාකච්ඡා කළා. LNG බලාගාරය අපි කරන්න ඕන, අපේ සම්පත් පිටට නොදීමේ ප්රතිපත්තිය රකින්න ඕනේ කියලා. අත්සන් කිරීම එතරම් වැදගත් නෑ. අපේ තීන්දුවයි ප්රධාන” ඔහු වැඩිදුරටත් කීවේය.
බතික්, අත්යන්ත්ර, රෙදි හා දේශීය ඇඟලුම් නිෂ්පාදන රාජ්ය අමාත්ය දයාසිරි ජයසේකර කීවේ ඇමරිකාවට රටේ බලශක්තිය පාලනය කිරීමට දිය නොහැකි බවය.
“මේ ගිවිසුම හරහා අමෙරිකාව විදුලිය දෙන එක නතර කළොත් අපිට විදුලිය නැති වෙනවා. ඒ විනාශයට අත උස්සන්න අපි සූදානම් නෑ.” ඔහු පැවසුවේය.
