මනම්පිටිය – නිමල් ජයරත්න –
ශ්රී ලංකාවේ තිබුණු කුඩා සහල් මෝල් 2000 න් එක්දහස් දෙසීයකම මේ වනවිට වැසී ඇති බව සුව ශක්ති සහල් මෝල් හිමියන්ගේ සංගමය පවසයි.
රජය මගින් ලබාගන්නා වී තොග සහල් බවට පත්කිරීමට මෙම කුඩා මෝල් හිමියන්ට අවස්ථාව ලබා දුන්නොත් පවතින සහල් මාෆියාව ඉවත් කිරීමේ වගකීම තමන් භාර ගන්නා බවද සංගමය කියයි.
පොලොන්නරුව වැලිකන්ද සුසිරිගම ශ්රී සුදර්ශනාරාමයේ අද ( 02 ) සවස පැවති මාධ්ය සාකච්ඡාවක දී එම සංගමය ඒ බව සඳහන් කළේය.
එහිදී අදහස් දැක්වූ සංගමයේ කැදවුම්කරු එච්. එම්. එස් .කේ. නිශ්ශංක කිවේ තමන්ට රජය මගින් ලබාගන්නා වී ලබා දෙන්නේ නම් කිලෝ එකක් රුපියල් තුන බැගින් කොටා සහල් කර සමුපකාර හා සතොස වෙළෙඳසල් වලට ලබාදීමේ හැකියාව පවතින බවය.
වැලිකන්දේ පමණක් සහල් මෝල් 50 කට වැඩි ප්රමාණයක් වැසී ඇති බවත්, රජය ලබා ගන්නා වී තොග තමන්ට කුලී පදනම මත කෙටීමට අවස්ථාව ලබා දෙන්නේ නම් එය විශාල සහනයක් වනු ඇති බවත් ඔහු කීවේය.
රජය මෙවර මහ කන්නයේ ලබා ගන්නා වී තොග පොළොන්නරුව දිස්ත්රික්කයේ මහා පරිමාණ වී මෝල් හිමියන්ට ලබා දීමේ කටයුත්තක ක්රියාත්මක වන බවත්, තමන් ණය වී ගොඩනඟා ගත් වී මෝල් වලට කුලී පදනම මත වී සහල් බවට පත් කිරිමට අවස්ථාව ලබාදීමෙන් ප්රදේශයේ වී ගොවියාට මෙන්ම සහල් පාරිභෝගිකයාටද වාසි රැසක් අත්වන බවත් කැඳවුම්කාරවරයා කීවේය.
“මේ වෙනවිට පිටරටින් ගෙනෙන්නෙ කරන්නේ සීයට පන්සියයක් රසායනික පෝර යෙදු සහල්. ඒක පැත්තකින් තියමු. තියන දේශීය හාල් ටික පාරිභෝගියන් අතර බෙදා දීමට රජය කුඩා සහල් මෝල් හිමියන් සමග අත්වැල් බැඳ ගන්නා ලෙස අපි ඉල්ලා සිටිනවා.“
“රටේ පවතින ආර්ථික තත්ත්වය මත අපේ සාමාජිකයන්ගේ ඉතිරි කුඩා සහල් මෝල් 800ත් වැසී යන්න දෙන්න එපා. විදුලිය විසන්ධි කරනවා. ඉන්ධන නෑ. අපට ගොඩනැගෙන්න තියන අවස්ථා ලැබෙන්නෙත් නෑ. මෙම තත්වයන් සැලකිල්ලට ගෙන ග්රාමීය පවතින කුඩා සහල් මෝල් හිමිකරුවන්ගේ ආර්ථිකය නැන්වීමට රජය ලබා ගන්නා වී තොග සහල් බවට පත් කිරීමේ වගකීම අපට දෙන්න කියලා යළිත් අපි ඉල්ලනවා.“
මෙම අවස්ථාවට සුව ශක්ති කුඩා සහල් හිමියන්ගේ සංගමයේ සභාපති ඒ.ආර්. චන්දිම අතුකෝරල, ලේකම් පී. ඒ.පී.කේ.පින්නවල ඇතුලු සාමාජික පිරිසක් ද එක්ව සිටියහ.
