ඉන්දියාවේ දී අත්අඩංගුවට පත් වුන ප්රබල මත්ද්රව්ය ජාවරම් කරුවෙක් වූ කිඹුලාඇලේ ගුණා ඇතුළු මෙරට ප්රබල සංවිධානාත්මක අපරාධකරුවන් පිරිසකට එරෙහිව ඉන්දීය ජාතික විමර්ශන ඒජන්සිය ඊයේ (16) චෝදනා පත්ර ගොනු කර තිබේ.
එල්.ටී.ටී.ඊ සංවිධානය යළි ගොඩනැංවීමේ අරමුණින් නීතිවිරෝධි අවි සහ මත්ද්රව්ය ජාවාරමේ නිරතවූ බවටවූ සාක්ෂි මත මෙම අපරාධකරුවන් පිරිස ඉන්දීය අපරාධ විමර්ශන අංශ විසින් අත් අඩංගුවට ගෙන තිබිණි.
එම පිරිස අතර ගුණසේකරන් හෙවත් කිඹුලාඇලේ ගුණා, පුෂ්පරාජා නොහොත් පූකුඩුකන්නා, මෙහොමඩ් අස්මීන්, සුනිල් ගාමිණී ෆොන්සේකා, ස්ටැන්ලි කෙනඩි ප්රනාන්දු, ලඩියා හෙවත් චන්ද්රසේන, ධනුක රොෂාන්, වැල්ලේ සුරංග, ධනරත්න නිලුක්ෂාන් සහ තිලීපන් යන ශ්රී ලාංකිකයින් 10 දෙනා මෙන්ම ඉන්දීය ජාතිකයින් තිදෙනෙකු ද වන බව සඳහන් වෙයි.
මෙම අපරාධකරුවන් ශ්රී ලංකාව සහ ඉන්දියාව අතර දිගුකලක සිට නීතිවිරෝධි ගිනිඅවි සහ මත්ද්රව්ය ජාවාරම්වල නිරත වී තිබිණි.
විමර්ශනවලදී අනාවරණය වී තිබුණේ පාකිස්තානයේ අවි සහ මත්ද්රව්ය සැපයුම්කරුවකු වන හාජි සලීම් නම් ජාවාරම්කරු සමඟ එක්වී කිඹුලාඇලේ ගුණාගේ කණ්ඩායම කටයුතු කර ඇති බවය.
මත්ද්රව්ය හා අවි ජාවාරම හරහා එල්.ටී.ටී.ඊ සංවිධානය යළි ගොඩනැංවීමට මුදල් ලබාදීම වෙනුවෙන් මොවුන් කටයුතු කර ඇතැයි හෙළි කරගෙන ඇත.
ඉන්දීය ජාතික විමර්ශන ඒජන්සිය චෝදනා පත්රය ගොනු කරමින් කියන්නේ එම ජාවාරම් මගින් ලැබෙන ආදායමෙන් මෙම පුද්ගලයින් සුඛෝපභෝගී ජීවිතයක් ගතකර ඇති බවය.
ජාවාරම සඳහා භාවිත කළ ජංගම දුරකතන, සිම් කාඩ්පත් සහ විවිධ ඩිජිටල් උපාංග, මත්ද්රව්ය ගනුදෙනුවලට අදාළ ලියකියවිලි මෙන්ම මුදල් හා රත්රං තොගයක් ද සැකකරුවන් සතුව තිබී සොයාගත් බවද විමර්ශන නිලධාරීන් අධිකරණයට දන්වා ඇත.
