කැබිනට් ඇමති ධූර සඳහා පොහොට්ටු අභ්යන්තරයේ දැඩි පොරයක් ඇති වී තිබීමත් ඒ සඳහා රාජපක්ෂ පවුලේ වැඩි බලපෑමක් එල්ලවීමත් නිසා රැජනගේ අවමංගල්යයට ගොස් පැමිණි පසු නව කැබිනට් මණ්ඩලය පත්කිරීමට අවසන් තීන්දුව ගෙන සිටි ජනාධිපති රනිල් වික්රමසිංහ අසරණ වී ඇති බව ආණ්ඩුවේ අභ්යන්තර ආරංචි මාර්ග සඳහන් කරයි.
මින් පෙර අවස්ථා හතරක දී නව කැබිනට් මණ්ඩලය දිවුරුම් දීම සඳහා දින නියම කරගෙන තිබුනත් පොහොට්ටුව ඇමති ධූර වෙනුවෙන් කරන කුළල්කා ගැනීම නිසා ඒ සෑම අවස්ථාවක්ම මගහැරී ගිය බව එම ආරංචි මාර්ග කියයි.
ඉතා විශ්වාසකටයුතු ආරංචි මාර්ග අනුව ලංකාසරට වාර්තාවන්නේ මහින්ද රාජපක්ෂ, නාමල් රාජපක්ෂ සහ විදේශගතව සිටින බැසිල් රාජපක්ෂ විසින් තම පවුලේ හිතවාදීන්ට කැබිනට් ඇමති තනතුරු ලබා දී ඊලඟ මැතිවරණ ව්යාපාරය රාජපක්ෂ පවුල මුල්කරගෙන මෙහෙයවීමේ බලවත් අභිලාෂයකින් සිදුකරන බලපෑම නිසා රටේ ඉතාම දුෂ්කර අවස්ථාවක ලෝකයට පෙනෙන සේවත් ස්ථාවර රජයක් හදා ගැනීමට ජනාධිපතිවරයාට නොහැකි වී ඇති බවය.
රනිල් වික්රමසිංහ මේ වනවිට සිය දේශපාලන ජීවිතයේ තීරණයක් ගත නොහැකි ඉතාම දුෂ්කර අවස්ථාවක් පසු කරන බවත්, රාජපක්ෂ පවුලේ බලපෑම ඔහු මේ ආකාරයෙන් දේශපාලනිකව අසරණ කර ඔහුගේ දේශපාලන සැලසුම අවුල් කර දමා ඇති බවත් එම ආරංචි මාර්ග හෙලි කරයි.
රටේ විධායක ජනාධිපතිවරයාට තමන්ගේ කැබිනට් මණ්ඩලය පත් කරගැනීමට නොහැකි වීම නොපෙනෙන ඛේදවාචයකත් බව මේ පිළිබඳ අදහස් දැක්වූ ආණ්ඩුවේ ප්රබලයෙක් ලංකාසරට පැවසුවේය.
