කීර්ති ප්රනාන්දු –
කැබිනට් අනුමැතිය සහිතව බිත්තර ආනයනය කිරීමට අවසර ලැබුණහොත් ඉන් වාසි ලබන්නේත් මේ රටේ බිත්තර හිඟය ඇති කළ දේශපාලන හයිය සහිත තොග වෙළෙඳ අතරමැදි කළුකඩ කාරයින් කීප දෙනෙක් බව සමස්ත ලංකා බිත්තර නිෂ්පාදකයින්ගේ සංගමයේ සභාපති ආර්.එම්. සරත් අත්තනායක පැවසීය.
කුමණ හෝ පදනමකින් මේ අවස්තාවේ බිත්තර ආනයනය කළහොත් මෙරට ග්රාමීය බිත්තර නිෂ්පාදන කර්මාන්තය විනාශ වී ගොස් සදහටම රටට අවශ්ය බිත්තර ආනයනය කිරීමට සිදුවනු ඇති බව ද ඔහු අනතුරු ඇඟවූයේය.
රට තුළ බිත්තර මිල වැඩිවීමට හේතුව බිත්තර අලෙවි කරන්නේ ගොවියන් නොව, කලුකඩ කාරයන් කිහිප දෙනෙකු වීම බවය. තම සංගමය හැමදාම කියා සිටියේ බිත්තරයක් රුපියල් 55 කට අඩුවෙන් අලෙවි කිරීමට හැකි බව යැයි හෙතෙම පෙන්වා දුන්නේය.
මේ වන විට රට තුළ බිත්තර නිෂ්පාදනය වර්ධනය වෙමින් පවතින බවත් මහා පරිමාණ නිෂ්පාදකයන් ට අමතරව ග්රාමීයව බිත්තර නිෂ්පාදකයන් කිකිළියන් 500, 1000. 2000,හදාගන්නට පටන් ගෙන ඇති බවත් පවසන සභාපතිවරයා ඉදිරි සති කීපය තුළ කිකිළියන් ලක්ෂ 20ක ගෙන් පමණ බිත්තර ලැබීමට නියමිත බව ද ඔහු කීවේය.
මෙහිදී වැඩිදුරටත් අදහස් දැක්වූ සරත් අත්තනායක මෙසේ ද පැවසීය
“ජාඇල ප්රදේශයේ කූල් රූම් තියෙන තොග වෙළෙන්දන් කිහිප දෙනකු ගොවියන්ගෙන් බිත්තර ටික වැඩි මිලට අරගෙන ගබඩා කරගෙන තියා ගන්නවා. පස්සේ බිත්තර හිඟයක් මවා පාමින් ඒ බිත්තර වැඩි මිලට වෙළඳපොළට එව්වා . ඒ නිසයි රට තුළ බිත්තර මිල ඉහළ ගියේ.
බිත්තර ගොවියා කවදාවත් වැඩි මිලට බිත්තර වික්කේ නැහැ . වැඩි මිලට බිත්තර වික්කේ බිත්තර තොග රැස්කර ගෙන හිටිය ඒ කළු කඩ කාරයො ටිකයි. දැන් පිටරටින් බිත්තර ගෙනාවොත් ඒ බිත්තර ගේන්නෙත් ඒ අයම තමයි.
ඒ ගෙනත් බිත්තර ටිකක් කූල් රූම් වල ගබඩා කරලා තියාගෙන සිංහල අවුරුදු කාලය වෙනකොට නැවතත් බිත්තර හිඟයක් මවාපාමින් වැඩි මිලට බිත්තර අලෙවි කරන්නට කරන සූදානමක් කියලා අපිට පෙනී යනවා.
අපි මේ වෙනකොට ආර්ථික මධ්යස්ථාන හරහා පාරිභෝගිකයින්ට රුපියල් 55 බැගින් බිත්තර මිලදී ගැනීමට අවශ්ය බිත්තර බෙදාහැරීමට කටයුතු කරගෙන යනවා. මේ වන විට බිත්තර වලට තියෙන ඉල්ලුම නිසාම වයසක කිකිළියන් මසට විකුණන්නෙ නැතිව ඔවුන්ගෙනුත් බිත්තර නිෂ්පාදනය කර ගැනීමට ගොවීන් යොමු වී තියෙනවා. .ඒ නිසා පෙබරවාරි මාසය අවසාන වනවිට බිත්තර ප්රශ්නය සම්පූර්ණයෙන් ම විසඳෙනවා.
සභාපතිවරයා වැඩිදුරටත් පැවසීය .
